Qazaqstannyń ońtústigindegi sý qoımalarynda 26 mlrd tekshe metrden astam sý jınaldy
ASTANA. KAZINFORM – Sý resýrstary jáne ırrıgatsııa mınıstrligi elimizdiń ońtústik óńirlerindegi sý qoımalarynda 26,2 mlrd tekshe metr sý jınalǵanyn málimdedi.
Vedomstvo málimetinshe, bul ótken jyldyń osy kezeńimen salystyrǵanda 500 mln tekshe metrge artyq.
Mınıstr Nurjan Nurjigitov Úkimet otyrysynda vegetatsııalyq kezeńniń turaqty ótýin qamtamasyz etý sharalary týraly baıandady. Onyń aıtýynsha, 2026 jylǵy sý tasqyny kezeńinde lımandar men kól júıelerine ekologııalyq maqsatta 12,8 mlrd tekshe metr erigen qar sýy jiberilgen.
– Sý resýrstaryn basqarýda ashyqtyqty arttyrý jáne jedel baqylaýdy kúsheıtý maqsatynda Jerdi qashyqtan zondtaý negizindegi ǵaryshtyq monıtorıng júıesi engizilip jatyr. Túrkistan oblysynda kelisimshartsyz sý alýdyń 39 faktisi anyqtalyp, shamamen 790 myń tekshe metr sýdyń zańsyz paıdalanylǵany belgili boldy, – dedi Nurjan Nurjigitov.
Mınıstrlik málimetinshe, Qyzylorda oblysyna 3,2 mlrd tekshe metr, Túrkistan oblysyna 3,8 mlrd tekshe metr, Almaty oblysyna 2,1 mlrd tekshe metr sý paıdalaný lımıti bekitilgen.
Vegetatsııalyq kezeńge daıyndyq aıasynda 1840 shaqyrym ırrıgatsııalyq kanal tazartylyp, 680 shaqyrym sýarý jelisi rekonstrýktsııalanǵan. Sondaı-aq 375 gıdrotehnıkalyq nysan jóndelgen.
Budan bólek, «Qazsýshar» RMK fılıaldary 181 nasos agregatyn daıyndap, qosymsha 92 nasos satyp alýdy josparlap otyr.
Aıta keteıik, Sý resýrstary jáne ırrıgatsııa mınıstrligi Telegram messendjerinde «Sýdyń qara naryǵyna jol joq!» chat-botyn iske qosqan bolatyn. Joba sý berý salasyndaǵy zańbuzýshylyqtar men sybaılas jemqorlyq faktilerin anyqtaýǵa baǵyttalǵan.
