Qazaqstannyń ońtústiginde 48 gradýsqa deıin aptap ystyq bolady
ASTANA. KAZINFORM — Qazaqstannyń ońtústik óńirlerinde 18 shildege deıin aptap ystyq saqtalady. Keı jerlerde aýa temperatýrasy 48 gradýsqa deıin jetýi múmkin. Bul týraly «Qazgıdromet» RMK qysqa merzimdi aýa raıy boljamdary basqarmasynyń basshysy Ardaq Qalmenova Jibek Joly telearnasynyń «Búgin Live» baǵdarlamasynda aıtty.
Onyń aıtýynsha, qazirgi ýaqytta Túrkistan jáne Qyzylorda oblystarynda kúndiz aýa temperatýrasy 43-45 gradýsqa deıin kóterilgen.
— Osyndaı qatty ystyq 18 shildege deıin jalǵasady. Osy óńirlerde kúndiz aýa temperatýrasy 43-48 gradýsqa deıin jetedi dep boljanyp otyr. Bul — shilde aıy úshin qalypty qubylys. Sondaı-aq elimizdiń bul aımaǵynda aldaǵy bes kúnde jaýyn-shashyn kútilmeıdi, — dedi Ardaq Qalmenova.
Mamannyń túsindirýinshe, qazirgi aptap ystyqqa Iran aýmaǵynan kelip jatqan ystyq ári qurǵaq aýa massalary sebep bolyp otyr. Sonyń áserinen elimizdiń basym bóliginde aýa temperatýrasy klımattyq normadan joǵary.
— Soltústik Qazaqstan, Aqmola jáne Pavlodar oblystarynda ázirge kúndiz 23-31 gradýs shamasynda bolady. Alaıda 18 shildeden bastap bul óńirlerde de ystyq kúsheıip, aýa temperatýrasy 30-35 gradýsqa deıin kóteriledi. Al batys óńirlerde aýa temperatýrasy birshama tómendep, kúndiz 23-31 gradýs bolady, — dedi basqarma basshysy.
Sonymen qosa «Qazgıdromet» mamany Astananyń aýa-raıy boljamyna da toqtalyp ótti.
— Astanada búgin kúndiz aýa temperatýrasy 35 gradýsqa deıin kóterildi. Erteń 30-33 gradýsqa deıin tómendeıdi. Alaıda 18 shildeden bastap elordada qaıtadan ystyq kúsheıip, aýa temperatýrasy 35-37 gradýsqa deıin jetedi, — dedi ol.
Aıta óteıik, 14 shildede Astanada aýa temperatýrasy 38,6 gradýsqa jetip, 1992 jyly osy kúni tirkelgen rekord jańardy.
