Qazaqstannyń óńirlik jáne jahandyq energetıkalyq qaýipsizdikte úlesi artady — IRENA
ASTANA. KAZINFORM — Energetıka salasynda Qazaqstan sııaqty «orta» derjava elderi aldyńǵy qatarǵa shyǵyp keledi. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda IRENA-nyń bas dırektory Franchesko La Kamera málim etti.
— Qazir jahandyq energetıkadaǵy mańyzdy kezeńde turmyz. Tómen kómirtekti ekonomıkaǵa kóshý, geosaıasattyń ózgerýi jáne energııany jetkizý tizbegin ártaraptandyrý qadamdary energetıkalyq tártiptiń ózgerýine yqpal etip otyr. Osy ózgermeli jaǵdaıda Qazaqstan sııaqty «orta» derjava elderi aldyńǵy qatarǵa shyǵyp keledi. Qazaqstan turaqty jáne qaýipsiz energetıkalyq landshaftty qalyptastyrýdyń belsendi qatysýshysyna aınalyp jatyr. Qazaqstannyń yqpalyn mol tabıǵı resýrstardy, ónerkásiptik áleýetti jáne eldiń túrli múmkindikterge beıimdelý qabiletin eskere otyryp atap ótýge bolady, — dedi Franchesko La Kamera.
Onyń aıtýynsha, qazir jańartylatyn energııa kózderi qarqyndy túrde damyp keledi jáne jyl saıyn jańa qýattar qosylyp jatyr. Bul turǵyda álem elderi taza energetıkaǵa kóshýge erekshe ekpin qoıyp otyr.
— Qazir kún jáne jel energııasynyń quny arzandap keledi. Sondyqtan klımattyń ózgerýi jaǵdaıynda atalǵan energııa kózderiniń básekege qabilettigi artady. Atap aıtqanda, dál osy sebepti «orta» derjavalar mańyzdy ról atqarady, óıtkeni orta derjavalar jahandyq dálizderdiń turaqtylyǵy men gúldenýin qamtamasyz ete otyryp, halyqaralyq yntymaqtastyqqa áser ete alady. Orta derjavalar energııany jetkizýdi ártaraptandyrý jáne qazba otyn baǵasynyń qubylmalyǵyna táýeldilikti azaıtý arqyly energetıkalyq qaýipsizdikti nyǵaıta alady. Shyǵys pen Batysty jalǵap turǵan Qazaqstan jańa tártipti qalyptastyrý úshin erekshe jaǵdaıǵa ıe. Infraqurylymǵa ınvestıtsııa salý, ınnovatsııalardy yntalandyrý jáne qarjylandyrýdy tartý arqyly Qazaqstan óziniń búkil energetıkalyq balansyn ártaraptandyryp, óńirlik jáne jahandyq energetıkalyq qaýipsizdikti nyǵaıtýǵa eleýli úles qosa alady, — dedi IRENA-nyń bas dırektory.
Budan buryn habarlanǵandaı, búgingi forýmda Úkimet basshysy Oljas Bektenov Qazaqstan Ortalyq Azııadaǵy eń iri polımer óndirýshi elge aınalatynyn aıtty.