Qazaqstannyń óńirlik turaqtylyqty qamtamasyz etýdegi belsendi áreketin quptaımyz — Antonıý Koshta
ASTANA. KAZINFORM — Qasym-Jomart Toqaev pen Antonıý Koshta birlesken málimdeme jasady. Eýropalyq Keńes Prezıdenti Qazaqstannyń óńirlik turaqtylyqty qamtamasyz etýdegi belsendi ári konstrýktıvti áreketin quptaıtynyn jetkizdi.
Antonıý Koshta halyqaralyq tártipke qaýip tóndirgen jahandyq shıelenister men qaqtyǵystar kezeńinde kúsh-jigerdi ortaq maqsatqa jumyldyrý mańyzdy ekenine toqtaldy.
— Ózderińizge belgili, Eýropa Odaǵy soǵysty toqtatý úshin Ýkraınamen tyǵyz qarym-qatynas jasaıdy. Biz seriktesterimizben birge Ýkraınada ádiletti jáne myzǵymas beıbitshilik ornatý ustanymyn árdaıym qoldaımyz. BUU Jarǵysyn jáne halyqaralyq quqyq qaǵıdattaryna negizdelgen tártipti dáıekti túrde qorǵap kele jatqan Qazaqstan tarapyna alǵys aıtamyz. Sondaı-aq Qazaqstannyń óńirlik turaqtylyqty qamtamasyz etýdegi belsendi ári konstrýktıvti áreketin, atap aıtqanda, Sizdiń Armenııa men Ázerbaıjan arasyndaǵy qaqtyǵysty retteýge kórsetken qoldaýyńyzdy quptaımyz. Beıbit ári órkendegen Ońtústik Kavkaz Eýropa men Ortalyq Azııa arasyndaǵy baılanystardy tereńdetýde asa mańyzdy ról atqarady, — dedi Eýropalyq Keńes basshysy.
Sonymen qatar mártebeli meıman Qazaqstan Prezıdenti júrgizip jatqan reformalarǵa joǵary baǵa berdi.
— Prezıdent Qasym-Jomart Toqaevtyń bastamasymen qolǵa alynǵan ekonomıkalyq, saıası jáne áleýmettik reformalarmen úılesim tapqan Qazaqstan qoǵamynyń órleý qarqyny ózara yntymaqtastyǵymyzdy jańa deńgeıge kóterýge negiz bolady. Biz birlese otyryp, qazirgi syn-qaterlerdi halyqtarymyzdyń keleshegine qyzmet etetin ortaq múmkindikterge aınaldyra alatynymyzǵa senimdimin, — dedi Antonıý Koshta.
Budan buryn Eýropalyq Keńes Prezıdenti jeńildetilgen vızalyq rejım azamattarymyzdyń barys-kelisine ońtaıly jaǵdaı týdyratynyn aıtty.