Qazaqstannyń óńirlik ónerkásibin baǵalaý jónindegi zertteý jarııalandy
ASTANA. KAZINFORM – QR SJRA Ulttyq statıstıka bıýrosynyń zertteýi Birikken Ulttar Uıymynyń Ónerkásiptik damý jónindegi uıymynyń (ıÝNIDO) statıstıkalyq bólimshesiniń platformasynda jarııalandy.
QR Strategııalyq josparlaý jáne reformalar agenttigi Ulttyq statıstıka bıýrosynyń taldamalyq eńbegi Birikken Ulttar Uıymynyń Ónerkásiptik damý jónindegi uıymynyń (ıÝNIDO) resmı statıstıkalyq platformasynda jaryq kórdi [stat.unido.org]. «Experimental Calculation of the Competitive Industrial Performance (CIP) Index for Kazakhstan’s Regions: Methodology and Comparative Insights» dep atalatyn jumys qujaty halyqaralyq uıymmen birlesken yntymaqtastyq sheńberinde ázirlengen.
Atalǵan joba aıasynda alǵash ret ıÝNIDO-nyń halyqaralyq ádisnamasy óńirlik deńgeıge beıimdelip, elimizdiń 20 aımaǵy boıynsha 2020–2023 jyldarǵa arnalǵan ónerkásiptik básekege qabilettilik ındeksiniń (CIP) eksperımenttik esepteýleri jasaldy. Bul zertteý óńirlerdegi ónerkásiptik belsendilikti baǵalaý tásilderin tereń salystyrýǵa jáne óndiristiń naqty geografııalyq ornalasýyn anyqtaýǵa jol ashty.
Taldaý qorytyndysy kórsetkendeı, dástúrli eksport statıstıkasy aımaqtardaǵy naqty ónerkásiptik áleýetti tolyq sıpattaı almaıdy. Sebebi bul derekter óndiris orny boıynsha emes, eksporttaýshy kásiporynnyń zańdy tirkelgen mekenjaıy boıynsha esepke alynady. Al óndiristik alańdardan tikeleı jóneltilgen daıyn ónim kólemin negizge alý ár oblystyń el ekonomıkasyna qosqan naqty úlesin obektıvti baǵalaýǵa múmkindik bergen.
Sonymen qatar jarııalanǵan qujatta óńirlik ónerkásip qurylymy, óndiristiń tehnologııalyq deńgeıi, sońǵy jyldardaǵy básekege qabilettilik dınamıkasy jáne alynǵan nátıjelerdiń kórneki vızýalızatsııasy tolyq qamtylǵan.
Zertteýdiń mundaı bedeldi jahandyq platformada jarııalanýy otandyq statıstıkalyq taldaýdyń halyqaralyq standarttarǵa saı ekenin jáne qazaqstandyq zertteýlerdiń ónerkásiptik statıstıka salasyndaǵy joǵary mańyzdylyǵyn dáleldeıdi. Qujattyń tolyq elektrondy nusqasy ıÝNIDO resmı saıtynyń jarııalanymdar bóliminde ornalasqan [stat.unido.org].
Eske sala keteıik, budan buryn Ulttyq kompanııalarda ónerkásiptik qaýipsizdikti arttyratyn JI elemnetteri engiziletinin jazǵan edik.
