Qazaqstannyń óńdelgen aýyl sharýashylyǵy ónimderi eksporty 3 mlrd dollardan asty
ASTANA. KAZINFORM – Qazaqstanda 2026 jyldyń alǵashqy segiz aıynda óńdelgen agroónerkásip ónimderiniń eksporty 3,04 mlrd AQSh dollaryna jetti. Bul ótken jyldyń sáıkes kezeńimen salystyrǵanda 35,1%-ǵa joǵary, dep habarlaıdy Aýyl sharýashylyǵy mınıstrligi.
Vedomstvo málimetinshe, elimizdiń jalpy agrarlyq eksportyndaǵy óńdelgen ónimderdiń úlesi 54,1%-dy qurady. Osylaısha aýyl sharýashylyǵy salasynan túsetin eksporttyq tabystyń jartysynan astamy óńdelgen ónimder esebinen qalyptasyp otyr.
Eksport ósimine astyq óńdeý salasy aıtarlyqtaı úles qosqan. 2025/2026 marketıngtik jylynda astyq pen un eksporty astyq balamasynda rekordtyq 16 mln tonnaǵa jetti.
Bıyl qańtar-tamyz aılarynda shetelge shamamen 400 mln dollardyń 1,38 mln tonna bıdaı jáne bıdaı-qara bıdaı uny eksporttaldy. Ótken jyldyń sáıkes kezeńimen salystyrǵanda jetkizilim kólemi 23%-ǵa, al eksporttyq túsim 36%-ǵa ósti.
– Nátıjesinde agrarlyq eksporttyń jalpy qunyndaǵy óńdelgen ónimniń úlesi 54,1%-ǵa jetti. Osylaısha, agrarlyq sektordyń eksporttyq túsiminiń jartysynan astamy óńdelgen ónimder esebinen qalyptasyp otyr, – dep habarlady mınıstrlik.
Maı jáne tońmaı ónerkásibinde de ósim tirkeldi. Kúnbaǵys, maqsary jáne maqta maılarynyń eksporty 49%-ǵa ulǵaıyp, 673 mln dollarǵa jetken. Raps pen qysha maılarynyń eksporty 2,3 ese artyp, 90 mln dollardy qurady.
Mal azyǵyna arnalǵan un eksporty 61%-ǵa ósip, 578 mln dollarǵa jetti. Shetelge jetkizilgen ónim kólemi 2,5 mln tonnany qurady.
Sıyr etiniń eksporty da aıtarlyqtaı ulǵaıǵan. Onyń quny 78%-ǵa ósip, 164 mln dollarǵa jetse, zattaı kólemi 26 myń tonnadan 29 myń tonnaǵa deıin artty.
Al kúnjara men shrot eksporty 42%-ǵa ulǵaıyp, 113 mln dollardy qurady.
Aýyl sharýashylyǵy mınıstrligi óńdeýshi kásiporyndardy qoldaý úshin jeńildetilgen kredıt berý, ınvestıtsııalyq sýbsıdııalaý jáne salyqtyq jeńildikter qarastyrylǵanyn málimdedi. 2024-2026 jyldary kásiporyndardyń aınalym qarajatyn tolyqtyrýǵa shamamen 230 mlrd teńge baǵyttalǵan.
Qazir Qazaqstanda jylyna 510 myń tonna shıkizat óńdeýge qaýqarly úsh mamandandyrylǵan kásiporyn jumys isteıdi. Sońǵy bes jylda krahmal ónimderiniń óndirisi 2,1 ese artqan.
Budan bólek, jalpy quny 4 mlrd dollarǵa jýyq alty iri ınvestıtsııalyq joba ázirlendi. Olar iske assa, jyl saıyn qosymsha 5,8 mln tonna shıkizatty tereń óńdeýge múmkindik týady.
Bıyl Túrkistan oblysynda jylyna 150 myń tonna júgeri óńdeıtin «Qazkrahmal» zaýyty paıdalanýǵa berildi. Jambyl oblysynda Fufeng Group óndiristik kesheni qurylysynyń birinshi kezeńi aıaqtaldy.
Sondaı-aq Qostanai Grain Industry jáne Tiryaki Agro jobalary júzege asyrylyp jatyr. Aqmola oblysynda taǵy eki óndiris ornyn ashý josparlanǵan.
Jańa kásiporyndardy shıkizatpen qamtamasyz etý úshin elimizde júgeri egistiginiń kólemi 60%-ǵa ulǵaıyp, 106 myń gektarǵa jetti.
Aıta keteıik, buǵan deıin Qazaqstanda 2025 jyldyń qorytyndysy boıynsha óńdelgen aýyl sharýashylyǵy ónimderiniń eksporty 3,6 mlrd dollarǵa jetip, bir jylda 35,3%-ǵa óskeni habarlanǵan edi. Al 2030 jylǵa qaraı agrarlyq eksporttaǵy óńdelgen ónimniń úlesin 70%-ǵa jetkizý josparlanyp otyr.
