Qazaqstannyń Olımpıada sportshylaryn Under Armour brendi kıindiredi

ASTANA. KAZINFORM – Týrızm jáne sport mınıstri Erbol Myrzabosynov Úkimet otyrysynan keıin ótken baspasóz máslıhatynda Olımpıadada Qazaqstan atynan shyǵatyn sportshylardyń kıimine aıtylyp júrgen synǵa jaýap berdi.

- Bizde sherý formasy men sporttyq forma bar. Bıyl sherý formasyn otandyq brend tolyq tegin tikken. Qazir aıtylyp jatqan syn-eskertpelerdiń bári eskerildi. Aldaǵy Azııa oıyndaryna tigiletin formaǵa konkýrs jarııalaımyz. Qazirgi sherý formasy sportshylarymyzǵa unady. Sport qaýymdastyqtary da maquldap otyr, - dedi ol.

Erbol Myrzabosynov sportshylardy kıindirý saıasaty ózgergenin atap ótti.

- Sherý formasynan bólek sporttyq-jaýyngerlik qural-jabdyq bar. Bıyl osy formaǵa kóp dúnıe baılanysty ekenin eskerip, Under Armour halyqaralyq brendimen kelisimshart bekittik. Ol formany sportshylar saıysqa kıedi. Ár sportshyǵa beriletin sómkede 18 túrli sporttyq ónim bolady. Ol qıimniń bári bıýdjetten tys aqshaǵa alynǵan. Buǵan deıin qysqy sport túrlerine basqa forma, jazǵy sport túrlerine basqa forma tigilse, bıyl sport brendimen birge ár sportshynyń garderobynda qysqy jáne jazǵy sport qural-jaraǵy bolady. Al sherý formasyna kelsek, jetildire túsemiz. Japonııanyń Nagoıa qalasynda ótetin jazǵy Azııa oıyndaryna tigiletin sherý formasyna ashyq konkýrs jarııalanady, - dedi mınıstr.

Eske salsaq, Mońǵolııanyń Olımpıada formasy taǵy da qazaqstandyq jeli qoldanýshylaryn tamsantqan bolatyn.