Qazaqstandyq oqýshylar Almatydaǵy mýzeılerge tegin kire alady
ALMATY. KAZINFORM – 24 qańtardan bastap elimizdiń mektep oqýshylary úshin Almatydaǵy mýzeılerge kirý tegin bolady. Almaty ákimdigi búgin tıisti sheshim shyǵardy.
Ákimdiktiń málimetinshe, bul oqý protsesin baıytyp qana qoımaı, balalardyń mádenıet, óner jáne tarıhqa degen tereń qyzyǵýshylyǵyn oıatýǵa múmkindik beredi. Sonymen qatar, mýzeılerge barý arqyly olardyń synı oılaý qabileti men analıtıkalyq daǵdylary damı túspek.
«Elimizde 3,9 mln oqýshy bar. Biz barlyq bala men jasóspirim óner týyndylaryn, artefaktiler men eksponattardy óz kózderimen kórip, dúnıetanymyn keńeıtkenin qalaımyz. Bul olarǵa qosymsha bilim alyp, tarıhı oqıǵalarǵa tereń úńilýge kómektesedi. Mektep oqýshylary mýzeılerge negizinen synyp jetekshilerimen birge keletinin baıqaımyz. Endi olar oqý jyly barysynda da, demalys kezinde de Almaty ákimdigine qarasty mýzeılerge tegin bara alady», – dep habarlady Almaty ákimdigi.
Almatyda mektep oqýshylary tegin bara alatyn mýzeılerdiń tizimi kelesideı:
1. Almaty tarıhy mýzeıi (Qabanbaı batyr kóshesi, 132)
2. Yqylas atyndaǵy halyq mýzykalyq aspaptar mýzeıi (Zenkov kóshesi, 24/A),
3. D.A. Qonaev mýzeıi (Tólebaev kóshesi, 117),
4. Ádebı-memorıaldyq mýzeı kesheni:
5. S. Muqanovtyń mýzeı-úıi (Tólebaev kóshesi, 125, 3-páter)
6. Ǵ. Músirepovtiń mýzeı-úıi (Qarasaı batyr kóshesi, 49, 25-páter)
7. Tilendıevtiń memorıaldyq mýzeıi (Qonaev kóshesi, 96),
8. A.Baıtursynulynyń mýzeı-úıi (Baıtursynuly kóshesi, 60)
9. Raıymbek batyr mýzeı kesheni (Raıymbek batyr dańǵyly, 96 a)
10. Mýltımedııalyq dástúrli mýzyka ortalyǵy («Nurkent» shaǵyn aýdany, 5/11).
