Qazaqstannyń Nıderland Koroldigindegi elshisi aýysty
ASTANA. KAZINFORM - Memleket basshysynyń Jarlyǵymen Qaırat Qudaıbergenuly Ábdirahmanov Qazaqstan Respýblıkasynyń Nıderland Koroldigindegi Tótenshe jáne Ókiletti Elshisi, Hımııalyq qarýǵa tyıym salý jónindegi uıym janyndaǵy Qazaqstan Respýblıkasynyń Turaqty ókili qyzmetin qosa atqarýshy bolyp taǵaıyndaldy.
Memleket basshysynyń Jarlyǵymen Asqar Qýanyshuly Jumaǵalıev Qazaqstan Respýblıkasynyń Nıderland Koroldigindegi Tótenshe jáne Ókiletti Elshisi, Hımııalyq qarýǵa tyıym salý jónindegi uıym janyndaǵy Qazaqstan Respýblıkasynyń Turaqty ókili qyzmetin qosa atqarýshy laýazymdarynan bosatyldy.
Qaırat Qudaıbergenuly Ábdirahmanov 1964 jylǵy 21 sáýirde Almaty oblysynda dúnıege kelgen. 1987 jyly S.M. Kırov atyndaǵy Qazaq memlekettik ýnıversıtetin «Tarıh» mamandyǵy boıynsha bitirgen.
Óz mansabyn 1987 jyly Qazaq polıtehnıkalyq ınstıtýtynda tarıh pániniń muǵalimi jáne ál-Farabı atyndaǵy Qazaq ulttyq ýnıversıtetiniń aspıranty retinde bastaǵan. 1993 jyly dıplomatııalyq qyzmetke aýysty.
1998 jylǵa deıin Qazaqstan Respýblıkasy Syrtqy ister mınıstrligi Ortalyq apparatynyń qurylymdyq bólimshelerinde ártúrli laýazymdardy atqardy, al 1998-1999 jyldary Úshinshi departamenti men Ekijaqty yntymaqtastyq departamentiniń dırektory boldy. 1999-2001 jyldary – QR Syrtqy ister vıtse-mınıstri, 2001 jyldan 2003 jylǵa deıin – Ulybrıtanııadaǵy QR Elshiliginiń keńesshi-ýákili.
2003-2006 jyldary Qazaqstannyń Izraıldegi Elshisi bolyp jumys istedi. Sodan keıin 2006-2007 jyldary QR Syrtqy ister mınıstriniń orynbasary qyzmetin atqardy, al 2007-2008 jyldary Qazaqstannyń Aýstrııadaǵy Elshisi jáne Venadaǵy halyqaralyq uıymdar janyndaǵy QR Turaqty ókili boldy.
2008-2011 jyldar aralyǵynda EQYU janyndaǵy QR Turaqty ókili qyzmetine taǵaıyndaldy, sodan keıin 2013 jylǵa deıin Aýstrııaǵa Qazaqstan Elshisi jáne Venadaǵy halyqaralyq uıymdar janyndaǵy Turaqty ókili laýazymyna oraldy.
2013-2016 jyldary – BUU janyndaǵy QR Turaqty ókili, 2016-2018 jyldary QR Syrtqy ister mınıstri qyzmetin atqardy. 2019-2020 jyldary Qazaqstannyń Shvetsııadaǵy jáne Danııadaǵy qosa atqarýshy Elshisi bolyp jumys istedi.
Qazaqstannyń Nıderlandtaǵy Elshisi, Hımııalyq qarýǵa tyıym salý jónindegi uıym janyndaǵy Qazaqstannyń Turaqty ókili qyzmetin qosa atqarýshy bolyp taǵaıyndalǵanǵa deıin 2020 jylǵy jeltoqsannan EQYU-nyń Az ulttar isteri jónindegi joǵarǵy komıssary boldy.
Tótenshe jáne Ókiletti Elshi dıplomatııalyq dárejege ıe.
Aǵylshyn tilin meńgergen.
