Qazaqstannyń nelikten Aýǵanstanmen qarym-qatynas ornatqanyn túsinemiz – AQSh elshisi
Qazaqstandaǵy AQSh elshisi Denıel Rozenblıým jýrnalıstermen ótken dóńgelek ústelde Qazaqstannyń qazirgi Aýǵanstan bıligimen qarym-qatynasy jóninde baıandady, dep habarlaıdy QazAqparat tilshisi.
Dóńgelek ústelde tilshiler Qazaqstan men Aýǵanstannyń qazirgi qarym-qatynasyna AQSh qalaı qaraıdy degen suraq qoıdy.
«Aýǵanstan taqyryby jáne onyń aımaqtaǵy orny – biz jergilikti seriktestermen jıi talqylaıtyn nárse. Buǵan deıin aıtqanymdaı, Qazaqstannyń barlyq kórshilerimen jaqsy qarym-qatynasty saqtaý qajettiligi Aýǵanstanǵa da qatysty. Biz Qazaqstanǵa nelikten Aýǵanstanmen ózara jemisti qarym-qatynas jasaýy qajetin jaqsy túsinip otyrmyz», - dep jaýap berdi dıplomat.
Degenmen, AQSh elshisi Qazaqstan Úkimetimen talıbandarmen qarym-qatynas týraly belgili bir ýaǵdalastyqtar bar ekenin aıtty.
«Bul ýaǵdalastyqtar – tek AQSh pen Qazaqstan arasyndaǵy emes, búkil halyqaralyq qoǵamdastyqta saqtalatyn qaǵıdattar. ıAǵnı, Aýǵanstannyń qazirgi bıligi belgili bir sharttardy oryndamaıynsha halyqaralyq deńgeıde moıyndalmaıdy. Ásirese úsh negizgi shart – eldegi terrorıstik toptarǵa qatysty batyl áreketter, eldegi barlyq toptardy qoldaıtyn, favorıtızm men artyqshylyq qaǵıdattaryna negizdelmegen ınklıýzıvti úkimet qurý, Aýǵanstannyń barlyq azamattaryna, atap aıtqanda áıelder men qyzdardyń quqyqtaryn qorǵaý jáne olarǵa bilim alý sııaqty negizgi quqyqtardy berý», - dep túsindirdi D. Rozenblıým.
Buǵan deıin Denıel Rozenblıým AQSh prezıdenti Djo Baıdenniń Ortalyq Azııaǵa sapary jóninde suraqtarǵa jaýap berdi.
Ortalyq Azııada Qazaqstan azamattaryna ǵana AQSh-tyń 10 jyldyq mıgratsııalyq emes vızasy beriledi. Elshi AQSh vızasyn berýdi jeńildetýge múddeli ekenderin aıtty.
Sondaı-aq, AQSh elshisi shet elden aqsha alatyn qazaqstandyqtardyń tizimine qatysty pikir bildirdi.
