Qazaqstannyń munaı qory qansha jylǵa jetedi
ASTANA. KAZINFORM — Qazaqstandaǵy barlanǵan munaı qory qazirgi óndirý qarqyny saqtalǵan jaǵdaıda shamamen 55 jylǵa jetedi. Bul týraly QR Energetıka mınıstrligi Kazinform agenttiginiń resmı saýalyna bergen jaýabynda málimdedi.
Vedomstvo dereginshe, elimizdegi óndirip alýǵa bolatyn balanstyq munaı qory 4,26 mıllıard tonna. Budan bólek, 0,17 mıllıard tonna balanstan tys qor bar.
— Qazirgi óndirý qarqyny saqtalǵan jaǵdaıda Qazaqstannyń munaı qory shamamen 55 jylǵa jetedi. Bul esep 2025 jylǵy 1 qańtardaǵy qor kólemi men jyldyq óndiris kórsetkishterine negizdelgen. Sonymen qatar eldiń munaı qory jańa ken oryndaryn barlaý jáne qoldanystaǵy qorlardy qaıta baǵalaý esebinen tolyǵyp keledi. Sońǵy bes jylda geologııalyq barlaý, qaıta baǵalaý jáne jańa ken oryndaryn memlekettik esepke qoıý nátıjesinde qor kólemi 404,7 mıllıon tonnaǵa artqan. Onyń 66,4 mıllıon tonnasy alǵash ret memlekettik esepke alynǵan ken oryndaryna tıesili, — delingen mınıstrlik málimetinde.
Osy kezeńde memlekettik esepke alǵash ret 38 kómirsýtek ken orny engizilgen. Naqtyraq aıtqanda, 2020 jyly — 8, 2021 jyly — 10, 2022 jyly — 8, 2023 jyly — 7, 2024 jyly 5 ken orny esepke qoıylǵan.
Qazir Qazaqstanda 190 munaı ken orny ıgerilip jatyr.
Aıta ketelik el aýmaǵynda ıgerýge jaramdy munaı qorynyń kólemi qandaı ekeni týraly jazǵan edik.
