Qazaqstannyń munaı-gaz kompanııalary ótken táýlikte ónim óndirý kólemin ulǵaıtty

Qazaqstannyń munaı-gaz kompanııalary ótken táýlikte ónim óndirý kólemin ulǵaıtty. Buǵan Kaspıı qubyr konsortsıýmynyń teńiz termınalynda tankerlerge munaı tıeýdi qaıta bastaǵany áser etken, dep habarlaıdy Kazinform.

ENERGO_OFFICIAL telegram arnasynda Qazaqstannyń munaı-gaz salasy boıynsha táýliktik deregi jarııalandy. 

1 jeltoqsanda elimizdiń munaı-gaz ónerkásibindegi kompanııalar 204,9 myń tonna munaı jáne gaz kondensatyn óndirgen. Al, ilespe gaz óndirýdiń táýliktik kórsetkishi – 144,3 mln tekshe metr. Sondaı-aq munaı óńdeý zaýyttary táýligine 50,9 myń tonna «qara altyn» óńdegen.

Bul kúni álemdik naryqta BRENT markaly munaıdyń 1 barreliniń baǵasy 79,16 dollarǵa turaqtady. Al, WTI munaıy úshin 1 barrelge usynylǵan baǵa – 74,40 dollar.

Eske sala ketelik, buǵan deıin Kaspıı qubyr konsortsıýmynyń teńiz termınalynda tankerlerge munaı tıeý qaıta bastalǵanyn habarlaǵan edik. 

Kaspıı qubyr konsortsıýmynyń baspasóz qyzmetiniń málimetinshe, 30 qarashada teńiz termınalynda tankerlerge munaıdy qaıta tıeý bastalǵan. 

«Qazir teńiz termınalynda munaıdy jóneltý VPÝ-1 jáne VPÝ-2 qurylǵylary arqyly shtattyq rejımde júzege asyrylyp jatyr. VPÝ-3 qurylǵysyndaǵy qalqymaly shlangilerdiń búlingen sektsııalaryn aýystyrý aýa raıynyń qolaıly kezinde qolda bar qosalqy bólshektermen júzege asyrylady. Qalqymaly shlangynyń zaqymdalǵan sektsııalary aýystyrylǵannan keıin VPÝ-3 qurylǵysynyń paıdalanýǵa berilgeni týraly qosymsha habarlanady», - dep málim etti konsortsıýmnyń baspasóz qyzmetinen.