Qazaqstannyń munaı-gaz kompanııalary ótken táýlikte qansha munaı óndirdi
Qazaqstannyń munaı-gaz ónerkásibindegi kompanııalar ótken táýlikte 184,6 myń tonna munaı jáne gaz kondensatyn óndirdi, dep dep habarlaıdy Kazinform.
Qazaqstan Respýblıkasynyń otyn-energetıkalyq kesheniniń ahýaldyq-taldaý ortalyǵy 28 qarashada elimizdiń aýmaǵynda óndirilgen munaı jáne gaz óndirý, «qara altyn» óńdeý kórsetkishin jarııalady.
Ótken táýlikte kompanııalar 184,6 myń tonnany munaı jáne gaz kondensatyn óndirgen. Bul kúni gaz óndirý kólemi 134,6 mln tekshe metrdi quraǵan. Al, munaı óńdeý zaýyttarynda táýligine 50,0 myń tonna shıkizat óńdelgen.
Eske sala ketelik, budan buryn Qazaqstandaǵy taǵy bir kompanııa munaı óndirý kólemin azaıtqanyn habarlaǵan bolatynbyz.
ENERGY MONITOR telegram kanalynyń málimetine qaraǵanda, keshe NCOC kompanııasy munaı óndirýdi 54 myń tonnadan 33 myń tonnaǵa deıin tómendetken.
«Taǵy bir iri qazaqstandyq kompanııa Kaspıı qubyr konsortsıýmynyń (KQK) aýa-raıynyń nasharlaýyna baılanysty Novorossıısk portyna munaı jóneltýdi toqtata turýyna baılanysty munaı óndirýdi shektedi. Keshe NCOC kompanııasy munaı óndirýdi 38%-ǵa, 54 myń tonnadan 33 myń tonnaǵa deıin tómendetti. TShO kompanııasy 26 qarashada óndiristi 50%-ǵa, 28 qarashada taǵy 10%-ǵa azaıtty», - dep habarlady ENERGY MONITOR.
Sondaı-aq Energetıka mınıstriniń keńesshisi elimizdiń iri ken oryndarynda munaı óndirý kólemi 56 paıyzǵa qysqarǵanyn aıtqan edi.
«Qazirgi sátte elimizdiń iri ken oryndarynda munaı óndirý kólemi 56 paıyzǵa tómendedi. Energetıka mınıstrliginde qandaı kezeńde jaǵdaıdyń turaqtalatyndyǵyna qatysty málimet joq. Taıaý keleshekte munaı óndirý kóleminiń tómendeýi men túzetilýi osy deńgeıde qalady», - dedi Energetıka mınıstriniń keńesshisi Shyńǵys Іlııasov.
