Qazaqstannyń munaı eksportynda Italııanyń úlesi 42 paıyzdan asty – sarapshy
ASTANA. KAZINFORM – Eýropanyń birtindep reseılik munaıdan bas tartyp jatqanyn eskersek, aldaǵy ýaqytta qazaq «qara altynynyń» EO-ǵa tasymaly ulǵaıa túspek. Bul rette strategııalyq serikteske aınalǵan Italııaǵa jóneltiletin munaı kólemi sheshýshi ról atqaratyny belgili.
Osy rette Ekonomıkalyq zertteýler ınstıtýty Saýda jáne ınvestıtsııalyq saıasatty damytý ortalyǵynyń sarapshysy Janar Berikqyzy eki eldiń shıkizat saýda-sattyǵyna qatysty boljamymen bólisti.
Eýropaǵa tasymaldanatyn otandyq munaıdyń basym deni Kaspıı qubyr konsortsıýmy (KQK) arqyly ótedi, ıaǵnı atalǵan eksporttyq baǵytqa jalpy tasymaldyń 80 paıyzdan astamy táýeldi. Janar Berikqyzynyń aıtýyna qaraǵanda, Qazaqstan qazir balama joldy izdeýge májbúr.
– Reseı tarapynan oqtyn-oqtyn oryn alǵan shekteýlerge baılanysty Qazaqstan balamaly baǵyttardy belsendi túrde damytýda. 2025 jyly Baký-Tbılısı-Djeıhan (BTC) qubyry arqyly jetkizý jańartylyp, osy baǵytta eksport kólemin jylyna 1,7 mln tonnaǵa deıin arttyrý josparlanyp otyr. Bul Qara teńizdegi reseılik porttarǵa táýeldilikti tómendetýge múmkindik beredi, – dep tarqatty sarapshy.
Italıandyq Eni kompanııasy Qashaǵan jáne Qarashyǵanaq ken oryndaryndaǵy konsortsıýmda jumys isteıdi. Ekologııalyq aıyppuldar men Qarashyǵanaqtaǵy gaz óńdeý zaýyty jobasynyń toqtaǵanyna qaramastan, Italııa munaı-gaz salasyndaǵy basty strategııalyq seriktes biri bolyp qaldy.
– Qazaqstannyń munaı eksportynda Italııanyń úlesi 42,8 paıyzǵa jetti. Prezıdent Qasym-Jomart Toqaev munaı eksportyn áli de ulǵaıtýǵa daıyn ekenin aıtqanyn bilemiz. Bul eki taraptyń da múddesine saı. Eýropanyń energetıkany qaıta baǵdarlaý josparynda orta merzimdi perspektıvada Qazaqstan tur. Reseıdi aınalyp ótip, kólik ınfraqurylymyn damytý arqyly ıtalıandyq jáne basqa eýropalyq naryqta qazaq munaıyn kóbeıtýge bolady. Osylaısha, Qazaqstan men Italııa arasyndaǵy munaı-gaz salasyndaǵy áriptestik Eýropanyń energetıkalyq qaýipsizdiginde eleýli orynǵa ıe, – dep túıindedi J.Berikqyzy.
Osyǵan deıin Qazaqstan men Italııa isker toptardyń baılanysyn nyǵaıtatyny týraly jazdyq.