Qazaqstannyń munaı eksporty bir jylda 2,2 mln tonnaǵa artqanmen, tabysy 3,1 mlrd dollarǵa kemigen

ASTANA. KAZINFORM – Qazaqstan 9 aıda eksporttaǵan munaı kólemi byltyrǵy 9 aımen salystyrǵanda 2,2 mln tonnaǵa artqanmen, túsken aqsha 3,1 mlrd dollarǵa kemigen.

Memlekettik kirister komıtetiniń resmı málimeti boıynsha, Qazaqstan 2025 jyldyń 9 aıynda 29 mlrd 696 mln 184,9 myń dollarǵa 56 mln 40,3 myń tonna shıki munaı eksporttaǵan. Onyń 7,4 mln tonnasy qyrkúıek aıyna tıesili.

Bıylǵy 9 aıdyń kórsetkishi 2024 jylǵy 9 aıdyń kórsetkishinen 2,2 mln tonna kóp ekenin de aıta ketý kerek. Biraq byltyr satqan munaıdyń kólemi az bolǵanymen túsken aqsha bıylǵydan kóp bolǵan. Naqty aıtsaq, 2024 jyldyń qańtar-qyrkúıek aralyǵynda 32 mlrd 829 mln 748,06 myń dollarǵa 53 mln 811,9 myń tonna munaı eksporttalǵan bolatyn.

Bıyl eksporttalǵan 56 mln tonna shıki munaıdyń 1,4 mln tonnasy Germanııaǵa, 3,7 mln Grekııaǵa, 2 mln Ispanııaǵa, 22 mln Italııaǵa, 2,7 mln Qytaıǵa, 7,7 mln Nıderlandyǵa, 3,8 mln Rýmynııaǵa, 1,1 mln Sıngapýrge, 2 mln Túrkııaǵa, 3,7 mln Frantsııaǵa, 1,4 mln Shveıtsarııaǵa jóneltilgen. Sonyń ishinde Germanııaǵa jóneltilgen shıki munaı kólemi byltyrǵy 9 aıdyń kórsetkishimen salystyrǵanda 221,4 myń tonna, Ispanııaǵa 698,2 myń tonna, Qytaıǵa 226,3 myń tonna, Nıderlandyǵa 2,2 mln tonna, Rýmynııaǵa 798,8 myń tonna, Túrkııaǵa 583,4 myń tonna artqan.

Al Grekııa (-122,1 myń tonna), Italııa (-965,4 myń tonna), Sıngapýr (-199,6 myń tonna), Frantsııa (-354,5 myń tonna), Shveıtsarııa (-137,2 myń tonna) Qazaqstan munaıy ımportyn byltyrǵy 9 aıǵa qaraǵanda birshama kemitken.

Buǵan deıin Qazaqstannyń munaı eksportynda Italııanyń úlesi 42 paıyzdan asqanyn jazǵan edik.