Qazaqstannyń Mońǵolııa, Nıgerııa jáne Kongoǵa qandaı spýtnık eksporttaıtyny belgili boldy
TAShKENT. KAZINFORM – Tashkentte ótken «Space Technology Conference – 2026» is-sharasyna qatysqan QR Aeroǵarysh komıteti tóraǵasynyń orynbasary Qýandyq Shúlenbaev Qazaqstannyń Mońǵolııa, Nıgerııa jáne Kongoǵa qandaı spýtnık eksporttaıtynyn aıtty, dep habarlaıdy Kazinform agenttiginiń Tashkenttegi menshikti tilshisi.
- Aeroǵarysh komıtetine qarasty «Ǵalam» JShS Qazaqstandaǵy túrli salalardyń qajettiligi úshin spýtnıkter qurastyryp jatyr. Sondaı-aq olar eń joǵary HR formatyndaǵy sýretterdi túsiretin jerserikterdi óndirip jatyr. Buǵan qosa, Mońǵolııa, Nıgerııa jáne Kongo elderine spýtnık eksporttaý kelisimderi boıynsha da jumys júrgizilip jatyr. Máselen, atalǵan memleketterdiń narǵyna SAR dep atalatyn jerserikterdi shyǵaramyz. Bul tehnologııa kez-kelgen aýa raıynda jumys isteıdi. Radıolokatsııalyq spýtnıkter bulttardyń kómeskeleýine qaramastan, aqparatty 100 paıyzdyq dáldikpen usynady, - dedi Qýandyq Shúlenbaev Kazinform tilshisiniń saýalyna jaýap bere otyryp.
Eske salaıyq, atalǵan konferentsııa barysynda 2027 jyly ǵaryshqa shyǵarylatyn túrki elderiniń birlesken spýtnıgi tanystyryldy.
Munymen birge jaqynda kosmosqa attanatyn tuńǵysh ózbek ǵaryshkerine qoıylatyn talaptar jarııalandy.
Qosa ketsek, bıyl Ózbekstan men Qytaı ǵaryshqa Jerdi qashyqtyqtan zondtaıtyn spýtnık ushyrýdy josparlap otyr.
Sondaı-aq, Ózbekstan 2028 jyly «Mirzo Ulug’bek» spýtnıgin ǵarysh keńistigine shyǵarady.
