Qazaqstannyń Mysyrdaǵy Elshiligi: qamaýǵa alynǵan stýdentterge kómek kórsetilip jatyr

ASTANA. KAZINFORM — QR Syrtqy ister mınıstrligi Mysyrǵa oqýǵa túsýge baryp, qamaýǵa alynǵan Qazaqstan azamattaryna qatysty túsinik berdi.

- Qazaqstan Respýblıkasynyń Mysyrdaǵy Elshiligi qamaýǵa alynǵan qazaqstandyqtarǵa qajetti konsýldyq-quqyqtyq kómek kórsetip jatyr. Jergilikti quqyq qorǵaý organdarymen baılanys ornatyp, máseleniń mán-jaıyn anyqtap jatyr. Resmı jaýap kelip túsken jaǵdaıda, qamaýǵa alynǵandardyń týysqandaryna tıisti aqparat jetkiziledi, - delingen mınıstrliktiń baspasóz qyzmetiniń Kazinform agenttigine bergen jaýabynda.

Sonymen qatar vedomstvo Mysyrda oqıtyn stýdentter oqý vızalaryn alý jáne jańartý kezinde bıýrokratııalyq kedergilerge tap bolatynyn rastady.

- Atap aıtqanda, vızany jańartý merzimi 4-5 aıǵa deıin sozylyp, kóshi-qon erejeleriniń buzylýyna alyp kelýi múmkin. Atalǵan máseleni sheshý úshin Qazaqstannyń Mysyrdaǵy Elshiligi jergilikti Іshki ister mınıstrligi jáne tıisti joǵary oqý oryndarynyń basshylyǵymen kelissózder ótkizip jatyr. Mysyr tarapy bul máseleni ońtaıly sheshýge beıildiligin rastady, - dep atalyp ótken QR Syrtqy ister mınıstrligi aqparatynda.

Aıta keteıik, jaqynda áleýmettik jelide Mysyrǵa dinı bilim alýǵa barǵan Qazaqstannyń 15 azamatyn polıtsııa qyzmetkerleri páterden alyp ketkeni jóninde aqparat tarady. Mysyrǵa oqýǵa túsýge saparlaǵandar bastapqyda týrıstik vızamen barady eken. Sonymen qatar, oqýǵa túsýge barǵan Qazaqstan azamattaryn polıtsııanyń ustap alyp ketýi oqıǵalary jıi kezdesetini aıtylyp otyr.

Osyǵan deıin Petropavldan Mysyr eline tikeleı áýe reısi ashylatyny týraly jazdyq.