Qazaqstannyń Memlekettik kúzet qyzmeti astanalyqtarǵa eskertý jasady

ASTANA. KAZINFORM — 27-28 qarashada elorda kósheleriniń jekelegen bóliginde kólik quraldarynyń júrýine ýaqytsha shekteý qoıylady, dep habarlaıdy Qazaqstan Respýblıkasynyń Memlekettik kúzet qyzmeti.

Shetel memleket basshylarynyń qatysýymen ótetin UQShU ujymdyq qaýipsizdik keńesi otyrysyn ótkizý jáne oǵan ázirlik aıasynda, 2024 jyly 27-28 qarashada elorda kósheleriniń jekelegen bóliginde kólik quraldarynyń júrýine ýaqytsha shekteý qoıylady.

— Ázirlik sharalarynda QR arnaýly memlekettik, quqyq qorǵaý jáne Qarýly Kúshter resýrstaryn, onyń ishinde áskerı avıatsııa men tehnıkany paıdalaný kózdelgen. Sonymen qatar, 27 qarashada Astana qalasynyń aspanynda QR QM maıdan avıatsııasynyń ushýy josparlanǵan. Elorda turǵyndary men qonaqtarynan halyqaralyq deńgeıdegi mańyzdy oqıǵa ýaqytynda ótkiziletin qaýipsizdikti qorǵaý sharalaryna túsinistikpen qaraýdy suraımyz, — dep eskertti vedomstvo.

Buǵan deıin habarlaǵanymyzdaı, Memlekettik kúzet qyzmetiniń qatary jas sarbazdarmen tolyqty.