Qazaqstannyń memlekettik boryshty basqarý keńesin qurýyna ne túrtki boldy

ASTANA. KAZINFORM — Qarjy mınıstri Mádı Takıevke Úkimet otyrysynan keıin ótken baspasóz máslıhatynda Qazaqstannyń memlekettik boryshty basqarý keńesin qurýyna ne túrtki bolǵany týraly saýal qoıyldy.

— Jalpy bul keńesti Ulttyq bankpen birlesip qurdyq. Jumys Úkimet pen Ulttyq banktiń ózara is-qımylyna baǵyttalǵan. Qazir bizdiń memlekettik qaryz 35 trln teńgege jetkenin bilesizder. Jalpy bul shekti kólemniń aıasynda, ishki jalpy ónimniń 23,5 paıyzyndaı. Memlekettik boryshtyń qurylymynda Úkimet pen jergilikti ákimdikterdiń boryshy bar. Memleket boryshynyń ózi halyqaralyq (syrtqy — red.) jáne ishki qaryz dep bólinedi, — dedi ol.

Mınıstrdiń aıtýynsha, bul keńes - ýaqytsha qurylym emes.

— Bul keńes nege kerek? Biz syrtqy naryqta da, ishki naryqta da qor bırjasyna qatysamyz. Sol arqyly bıýdjet tapshylyǵyn jabamyz. Osylaısha Ulttyq bankpen birge memlekettik baǵaly qaǵazdar shyǵarý strategııasyn ázirleýimiz kerek. Osy arqyly memlekettik boryshty basqaryp, jaǵymdy jáne jaǵymsyz qozǵalystardy kórip otyramyz. Búgin osy keńestiń alǵashqy otyrysy ótedi. Al memlekettik boryshty basqarý isinde eshbir problema joq. Bul — Ulttyq bankpen birlesip qabyldanǵan sheshim. Keńes naqty bir kezeńge qurylǵan joq. Únemi jumys isteıdi, — dedi mınıstr.

Buǵan deıin Qazaqstannyń syrtqy memlekettik boryshy 15,9 mlrd dollarǵa jetkenin jazǵan edik.