Qazaqstannyń memlekettik baǵaly qaǵazdary J. P. Morgan baqylaý tizimine qosyldy
ASTANA. KAZINFORM – Qazaqstannyń memlekettik baǵaly qaǵazdary GBI-EM (Government Bond Index – Emerging Markets) ındeksine engizý úshin J. P. Morgan baqylaý tizimine qosyldy. Bul týraly Qarjy mınıstrligi habarlady.
J.P. Morgan ındekstik jiktemesin qaıta qaraý qorytyndysy boıynsha 2026 jyly Qazaqstanǵa GBI–EM damýshy naryqtar ındeksine eldiń memlekettik baǵaly qaǵazdaryn áleýetti engizý úshin Index Watch–Positive (baqylaýdyń oń tizimi) mártebesi berildi.
12 aı ishinde halyqaralyq klırıng jáne esep aıyrysý ınfraqurylymy arqyly qol jetkizý múmkindigin qosa alǵanda, halyqaralyq ınvestorlar úshin qazaqstandyq memlekettik baǵaly qaǵazdar naryǵynyń qoljetimdiligi baǵalanatyn bolady. Indeks krıterıılerine sáıkes keletin oblıgatsııalardyń ótimdiligi de qarastyrylady.
Mártebe berý Qazaqstan Respýblıkasy Qarjy mınıstrligi men Qazaqstan Ulttyq Bankiniń memlekettik baǵaly qaǵazdar naryǵyn damytý, naryqtyq ınfraqurylymdy jetildirý jáne halyqaralyq ınvestorlar úshin qazaqstandyq qarjy quraldarynyń qoljetimdiligin arttyrý jónindegi birlesken jumysynyń mańyzdy nátıjesi boldy.
Qaraýdyń jańa kezeńine kóshý qazaqstandyq memlekettik baǵaly qaǵazdar naryǵyn halyqaralyq kapıtal naryqtaryna ıntegratsııalaýdaǵy progresti rastaıdy. Indekske áleýetti engizý sheteldik ınvestorlar bazasyn keńeıtýge, ótimdilikti arttyrýǵa jáne qaryz alý qunyn tómendetýge yqpal etetin bolady.
Baǵaly qaǵazdar naryǵynyń kásibı qatysýshylary jańa model boıynsha baǵalanatynyn jazǵan edik.
