Qazaqstannyń maı óńdeý salasy 4 jylda 2,3 ese ósim kórsetti
ASTANA. KAZINFORM – Keıingi tórt jylda kúnbaǵys maıynyń óndirisi 2,3 esege ósip, 752 myń tonnadan asty. Búginde maı óńdeý salasy óńdelgen aýyl sharýashylyǵy ónimderi eksportynyń 27%-yn qamtamasyz etedi. Bul týraly Saýda jáne ıntegratsııa vıtse-mınıstri Áset Núsipov habarlady.
– 2025 jyldyń qorytyndysy boıynsha saladaǵy óndiris kólemi alǵash ret 1,57 mıllıon tonnadan asyp, eksporttyq tabys 963 mıllıon AQSh dollaryna jetti. Bul kórsetkish 2021 jylmen salystyrǵanda tórt esege kóp, - dedi ol «FOC:2026 Fats and Oils Conference» forýmynda.
Otandyq maı óńdeý salasy 2025 jyly rekordtyq kórsetkishke qol jetkizip, eksporttan túsken tabys kólemi shamamen 1 mlrd dollarǵa jetti.
Áset Núsipovtiń aıtýynsha, Qazaqstannyń agroónerkásip kesheni búginde tereń transformatsııa kezeńinen ótip jatyr. El shıkizat eksportynan birtindep joǵary ónimniń ózin óndirýge kóshken.
– Ótken jyldyń qorytyndysy boıynsha Qazaqstan álemdik kúnbaǵys maıy eksportynyń shamamen 3,6%-yn qamtamasyz etip, jetekshi eksporttaýshy elderdiń qataryna kirdi. Maıly daqyldar men olardy óńdeý ónimderiniń eksporty 70%-ǵa ósti, - dedi vıtse-mınıstr.
Onyń sózinshe, memleket óńdeýshi kásiporyndardy qoldaý, jańa naryqtarǵa shyǵý jáne eksporttyq áleýetti arttyrý boıynsha birqatar shara iske asyryp keledi.
Aıta keteıik, buǵan deıin, Maı óńdeý salasy Qazaqstan ekonomıkasyna 1 mlrd AQSh dollary kóleminde tabys ákelgen bolatyn.
Darııa Ǵumar
