Qazaqstannyń mádenı murasyn halyqaralyq deńgeıde ilgeriletý máseleleri talqylandy
ASTANA.KAZINFORM - Óńirlik ekologııalyq sammıt–2026 aıasynda QR Premer-mınıstriniń orynbasary — Mádenıet jáne aqparat mınıstri Aıda Balaeva ISESKO-nyń Bas dırektory Salım ben Muhammed ál-Málikpen kezdesý ótkizdi.
Kezdesý barysynda taraptar yntymaqtastyqtyń qazirgi jaı-kúıi men aldaǵy damý perspektıvalaryn talqylady. Aıda Balaeva Qazaqstan úshin mádenı murany saqtaý men ony halyqaralyq deńgeıde dáripteýge baǵyttalǵan baǵdarlamalar men bastamalarǵa qatysýdyń aıryqsha mańyzǵa ıe ekenin atap ótti.
— Sizdiń Qazaqstan qalalarynyń birine ıslam áleminiń mádenı astanasy mártebesin berý jónindegi bastamańyz Memleket basshysynyń qoldaýyna ıe boldy. Osyǵan baılanysty Túrkistan qalasyn 2027 jyly ISESKO-nyń mádenı astanasy mártebesine usynýǵa daıyn ekenimizdi rastaımyz, — dedi Aıda Balaeva.
Sondaı-aq, taraptar Túrkistannyń áleýetin tek túrki dúnıesiniń rýhanı astanasy retinde ǵana emes, týrıstik jáne mádenı múmkindigi joǵary shahar retinde jan-jaqty ashýǵa baǵyttalǵan, usynymdar men aldaǵy is-qımyl tetikterin qamtıtyn birlesken yntymaqtastyq josparyn ázirleý máselesine erekshe nazar aýdardy.
Budan bólek, qazaqstandyq tarap QR Mádenıet jáne aqparat mınıstrligi men ISESKO arasynda ıslam áleminiń murasyn saqtaý jáne ilgeriletý jónindegi birlesken jospar jobasyn ázirlep, joldaýǵa daıyn ekenin jetkizdi. Atalǵan qujatta kadr daıarlaý, restavrator mamandardyń biliktiligin arttyrý, oqytý semınarlaryn ótkizý, sondaı-aq óńirlik ǵalymdar men sarapshylardyń taǵylymdamalaryn uıymdastyrý baǵytyndaǵy saraptamalyq talqylaýlar men bilim berý baǵdarlamalaryn iske asyrý kózdeledi.
Óz kezeginde Salım ben Muhammed ál-Málik Qazaqstanmen yntymaqtastyqtyń turaqty túrde damyp kele jatqanyn atap ótip, qazaqstandyq taraptyń bastamalaryna joǵary baǵa berdi.
Qazaqstannyń mádenı murasyn ISESKO aıasynda halyqaralyq deńgeıde ilgeriletýdi kúsheıtý maqsatynda Premer-mınıstrdiń orynbasary túrki-ıslam oıý-órnegi men qoldanbaly óner festıvalin ótkizýdi usyndy. Bul bastama aıasynda qazaq oıý-órnegi, kilem toqý óneri jáne zergerlik kásip boıynsha kórmeler men sheberlik sabaqtaryn uıymdastyrý josparlanyp otyr.
Kezdesý qorytyndysy boıynsha taraptar áriptestikti odan ári nyǵaıtýǵa jáne mádenı murany ilgeriletýge, halyqaralyq gýmanıtarlyq yntymaqtastyqty damytýǵa baǵyttalǵan birlesken jobalardy júzege asyrýǵa daıyn ekenderin rastady.
Aıta ketelik Qazaqtyń dástúrli «Oıý-órnegi» resmı túrde ISESKO-nyń Islam álemi muralary tizimine endi.
