Qazaqstannyń mádenı qundylyqtary týraly onlaın-portal ashylady

ASTANA. KAZINFORM – Bıyl 8 tilde aqparat taratatyn «Mádenıet» onlaın-portaly iske qosylady. Onda árbir qyzyǵýshy úıden shyqpaı, tól mádenıetimizben tanysa alady. Bul týraly QR Mádenıet jáne aqparat mınıstri Aıda Balaeva aıtyp berdi.

«Elimizdiń mádenı salasynda sheshilmegen dúnıe kóp, biraq bul bizde tolyqqandy qalyptasqan, baı murasy, elge kórseter tálim-tárbıesi, maqtanyshpen aıtar áńgimesi bar tól mádenıet joq degen sóz emes. Biz barymyzdy uqsatyp, joǵymyzdy jańǵyrtyp, eń aldymen, óz halqymyzǵa, sosyn syrtqy jurtqa usynýymyz kerek. Mádenı qundylyǵymyzdy tek mýzeı, teatr, kontsertterge shaqyrýymen, kórmeler men týrlar uıymdastyrýmen shektemeýimiz qajet», - dedi A. Balaeva Qazmedıa ortalyǵynda mınıstrliktiń alqa otyrysynda.

Osy rette, bıyl alǵash ret 8 tilde taralatyn «Mádenıet» onlaın-portaly iske qosylady.

«Jańa portal arqyly mádenı qundylyqtarymyzdy qazaqstandyq qana emes, shet el aýdıtorııasyna nasıhat etýdi maqsat etip otyrmyz. Onyń negizgi mindeti – árbir qyzyǵýshy úıden shyqpaı, tól mádenıetimizdiń barlyq saı-salasyn aralaýǵa – mýzeı, kitaphana, teatr, ulttyq kıno, kórmeler, rýhanı qoryqtar, ulttyq mýzykanyń altyn qory men zamanaýı áýezdiń jańa úlgilerimen tanysýǵa jaǵdaı jasaý. Mundaı jobalar álemdik tájirıbede óz tıimdiligin baıaǵyda-aq kórsetken. Máselen, kúnine 50 myń adam kiretin «Lývr» mýzeıi onlaın keńistikte 10 mln «vırtýaldy týrıst» qabyldaıdy», - deıdi A. Balaeva.

Buǵan deıin Mádenıet mınıstri «Qazaqfılm» kınostýdııasynyń qazirgi jaı-kúıi týraly pikir bildirgen edi.