Qazaqstannyń kúı qoryna Altaı, Tarbaǵataı jáne Іle qazaqtarynyń 160 týyndysy qosyldy
ASTANA. KAZINFORM – Táýelsizdik kúni qarsańynda elimizdiń kúı qory sheteldegi qazaqtar arasynda saqtalǵan qomaqty qazynamen tolyqty, dep habarlaıdy Kazinform tilshisi.
Astanada elimizdiń ár túkpirinen jınalǵan 18 kúıshi bas qosty. Olardyń bári – shetelden kóship kelgen qandastar. Altaı, Tarbaǵataı jáne Іle aımaqtary – kúı óneri mektebi negizindegi 160 tan astam kúıdi Qazaq radıosy altyn qoryna jazyp alsa, «Abaı» telearnasy kúı ónerin nasıhattaýǵa arnalǵan «Qos alqa» baǵdarlamasy jobanyń úsh bólimin osy úsh óńirge arnady.
– «Abaı» telearnasy qolǵa alǵan jańa joba – «Qos alqa» baǵdarlamasy halqymyzdyń kúı qazynasyn nasıhattap, bolashaq urpaqqa jetkizýge baǵyttalǵan. Sonymen birge jas talanttardy, oryndaýshylardy elge tanystyramyz. Jobada kúı mamandary sarapshy bola otyryp, kúıdiń tarıhy, bolmysy, oryndaý sheberligi, sonymen birge kúıdiń zerttelýi jaıynda pikirlerimen bólisedi. Ár shyǵarylym qazaqtyń ár kúı mektebine arnalady. Biz buǵan deıin Batys kúıshilik mektebin, Jetisý kúıshilik mektebin, Arqa kúıshilik mektebin túsirdik. Jobanyń 3 bólimin Altaı, Tarbaǵataı jáne Іle kúı mektepterine arnap otyrmyz, - deıdi «Abaı» telearnasynyń prodıýser-redaktory Gaýhar Tólekbaı.
Kóp jyldan beri qazaq halqynyń murasyn, ulttyq ónerdi nasıhattap kele jatqan kúıshi, «Qurmet» ordeniniń ıegeri Sársenǵalı Júzbaı Qazaq radıosynyń altyn qory taptyrmas qundy muramen tolyqqanyn aıtty.
– Biz bilmeıtin, siz bilmeıtin kúılerdiń úlgilerin osy joly jazyp aldyq. Óneri atadan balaǵa jalǵasqan dáýlesker kúıshiler jınalypty. Jastardan bastap, jasy 80-nen asqan qarııalar bar, Aldy 30-dan astam kúı tartsa, jastardyń ózi 5-6 kúıden shertip berdi. Osylaısha qazaqtyń kúı qoryn qomaqty qazynamen tolyqtyrdy. Bul kisilerdiń shertisinde úlken dástúr jatyr. Olardyń qaı-qaısysy da keıingi urpaqqa úlgi bolatyn kúıshiler. Barlyǵynyń qasyna shákirt qosyp tárbıelese, osy kúıshilik dástúr keıinge jalǵanar edi. Bul sharanyń taǵy bir tarıhı mańyzy – eki ǵasyrdyń kýási bolǵan Dolda Keneshuly sekildi qazynaly qarttarymyz bilgen-túıgenin kelip, bizdiń altyn qorymyzǵa qaldyryp jatyr. Ásirese kúılerdiń tarıhyna, nusqalaryna qatysty biz bilmeıtin kóptegen derekti jaqsy biletini baıqaldy, - deıdi kúıshi.
Іs-sharany uıymdastyryp, kúıshilerdiń basyn qosqan Erkeǵalı Rahmadıev atyndaǵy Memlekettik akademııalyq fılarmonııasy "Saryarqa" halyq mýzyka ansambliniń sybyzǵyshy, kompozıtor, QR mádenıet salasynyń úzdigi Shyǵys Mahan bul jobanyń aldaǵy ýaqytta da jalǵasatynyn aıtady.
– Kúıshilik atadan balaǵa qonady ǵoı. Dál solaı jeti atasynan kúı shertken áýletterden keldi. Sheteldegi qazaqtar arasynda saqtalǵan kúılerdi júıelep, qara shańyraqtaǵy úlken arnaǵa qosý burynnan oıda júrgen is edi. Abaı telearnasy men qazaq radıosynyń jobalary aıasynda sátti júzege asyp jatyr. Jobanyń negizgi maqsaty – arǵy bettegi kúılerdi sol jerde týyp-ósken adamdardan arnaıy jazyp alý boldy. Kúıshilerdiń kelip-ketýine jaǵdaı jasap, qoldaý bildirgen «NurArqa» JShS basshysy Nurdaýlet Nubarakulyna, «Qut medııa» kompanııasyna alǵys bildiremiz. Bul joba aldaǵy ýaqytta da jalǵasyn tabady, - deıdi Shyǵys Maqanuly.
Eske sala keteıik, Qytaıdaǵy qazaqtar arasynda keń taraǵan «Qaıran áke» kúıiniń avtory ómirden ótkenin jazǵan edik.