Qazaqstannyń Qurmetti jýrnalısi Januzaq Aıazbekov ómirden ozdy
ASTANA. KAZINFORM — Jazýshy, pýblıtsıst, Qazaqstan Jazýshylar odaǵynyń Qostanaı oblysyndaǵy ókili, Qazaqstannyń Qurmetti jýrnalısi Januzaq Aıazbekov dúnıeden ótti.
QR Mádenıet jáne aqparat mınıstrligi Januzaq Aıazbekovtiń dúnıeden ótýine baılanysty otbasy men týǵan-týystaryna, áriptesteri men barsha oqyrman qaýymǵa qaıǵyra kóńil aıtty.
— Januzaq Aıazbekov sanaly ǵumyryn qazaq jýrnalıstıkasy men ádebıetiniń damýyna arnap, taǵylymdy týyndylarymen oqyrman yqylasyna bólendi. Eńbek jolyn Qostanaı oblystyq teleradıo komıtetinde bastap, óńirlik radıo men baspasóz salasynda jaýapty qyzmetter atqardy. Kásibı bilimi men mol tájirıbesin eldik múddege jumsaǵan azamattyń jýrnalıstıka men rýhanııat salasyndaǵy eńbegi árdaıym joǵary baǵalandy. Januzaq Aıazbekovtiń jarqyn beınesi, ǵıbratty ǵumyr joly men artynda qaldyrǵan shyǵarmashylyq murasy el esinde saqtalady. Marqumnyń jany jánnattan jaı taýyp, jatqan jeri jaryq, topyraǵy torqa bolsyn! — delingen mınıstrlik habarlamasynda.
Buǵan deıin Qazaqstannyń halyq ártisi Esmuhan Obaev dúnıeden ozǵanyn jazǵanbyz.
