Qazaqstannyń kredıttik reıtıngi 10 jylda alǵash ret «BBB» deńgeıine kóterildi
ASTANA. KAZINFORM — S&P Global Ratings Qazaqstannyń táýelsiz kredıttik reıtıngin «BBB» deńgeıine kóterdi. Bul — eldiń 2016 jyldan beri jetken eń joǵary kórsetkishi. Agenttik Qazaqstan ekonomıkasynyń ornyqtylyǵyn, ınvestıtsııalyq áleýetin jáne qarjylyq býferleriniń jetkiliktiligin atap ótti. Bul týraly Ekonomıka mınıstrligi málim etti.
S&P Global Ratings halyqaralyq reıtıngtik agenttigi Qazaqstan Respýblıkasynyń táýelsiz kredıttik reıtıngin «BBB» deńgeıine deıin kóterdi. Agenttiktiń shákili boıynsha reıtıngtiń osy deńgeıine 2016 jyldan beri alǵash ret qol jetkizilip otyr.
Táýelsiz kredıttik reıtıngtiń kóterilýi eldiń ekonomıkalyq damýynyń ornyqty perspektıvalaryn, ekonomıkanyń ártaraptandyrylýy jalǵasyp jatqanyn ári syrtqy jáne fıskaldyq býferlerdiń aıtarlyqtaı jınaqtalǵanyn kórsetedi.
Agenttiktiń baǵalaýy boıynsha, Qazaqstannyń ekonomıkasy syrtqy syn-qaterlerge jáne álemdik taýar naryqtaryndaǵy baǵanyń qubylmalylyǵyna qaramastan, ornyqty bolyp qalady jáne orta merzimdi perspektıvada ósýdi jalǵastyrady.
Sarapshylardyń boljamynsha, 2026 jyly JІÓ-niń naqty ósýi 5,1%-dy quraıdy, bolashaqta Qazaqstannyń ekonomıkasy munaı eksporttaýshy elder arasynda salystyrmaly túrde joǵary qarqynmen ósetin bolady. S&P ekonomıkany ártaraptandyrýǵa baǵyttalyp, iske asyrylyp jatqan aýqymdy ınvestıtsııalyq baǵdarlamanyń rólin atap ótedi.
Shıkizat óńdeýdi jáne ınfraqurylymdy damytý, onyń ishinde «Báıterek» UIH» AQ arqyly damytý jónindegi jobalardyń qarjylandyrylýy keleshekte ınvestıtsııalar deńgeıin JІÓ-niń 30%-na deıin ulǵaıtýǵa múmkindik beredi. S&P pikirinshe, bıýdjet shyǵystarynyń qalypty qarqynmen ósýi jáne salyqtyq bazany keńeıtý jónindegi sharalar bıýdjet tapshylyǵyn qysqartýǵa múmkindik beredi.
Qazaqstan valıýtalyq aktıvteriniń mólsheri syrtqy boryshynyń qalypty kóleminen asatyndaı edáýir mólsherde bolǵanda, syrtqy kredıtor retinde myqty pozıtsııasyn saqtaıdy. Sondaı-aq, agenttik bank sektorynyń makroekonomıkalyq kúızelisterge ornyqtylyǵyn atap ótti.
Retteý jáne qadaǵalaý jónindegi saıasattyń birtindep jetildirilýi bank sektorynyń ornyqtylyǵynyń artýyna jáne aktıvter sapasyna baılanysty júıelik táýekelderdiń tómendeýine yqpal etti. Bunyń aldynda eldiń táýelsiz kredıttik reıtıngi «BBB-» deńgeıinde bolǵan.
Aıta keteıik, maýsym aıynda Fitch Ratings halyqaralyq reıtıngtik agenttigi Qazaqstannyń táýelsiz kredıttik reıtıngin «BBB» deńgeıinde rastaǵan bolatyn.
