Qazaqstannyń kommýnaldyq sektoryn jańǵyrtýǵa 6 halyqaralyq qarjy ınstıtýty kómektesedi
ASTANA. KAZINFORM – 2025 jyldan 2026 jylǵa deıin turǵyn úı-kommýnaldyq sharýashylyq salasyn qarjylandyrý kólemi eki esege ulǵaıtyldy. Bul týraly Ulttyq ekonomıka vıtse-mınıstri Asan Darbaev Úkimet otyrysynda aıtty.
Vıtse-mınıstrdiń aıtýynsha, bul «Energetıkalyq jáne kommýnaldyq sektorlardy jańǵyrtý» ulttyq jobasynda kózdelgen jańa tetikterdiń tıimdiligin aıqyn kórsetedi.
– Ulttyq jobany iske asyrýǵa jeke jáne sheteldik kapıtal tartylǵan. 2026 jylǵa maquldanǵan qaryz qarajatynyń jalpy kólemi 625 mlrd teńgeni quraıdy. Onyń ishinde alty jetekshi halyqaralyq qarjy ınstıtýty qarastyrylǵan. Bul sharalar uzaq merzimde ári tómen quny bar qarjy resýrstaryn tartýǵa múmkindik beredi. Sonyń nátıjesinde kommýnaldyq qyzmetterdiń ózindik qunyna túsetin júkteme tómendeıdi. 2025 jyly 31 mlrd 700 mln teńge qarjy tartyldy, – dedi Ulttyq ekonomıka vıtse-mınıstri.
Sonymen birge, turǵyn úı-kommýnaldyq sharýashylyqtyń biryńǵaı tsıfrlyq platformasy – Smart Turmys platformasynyń eki modýlin engizý jumystary júrip jatyr.
Ulttyq joba iske asyrylǵaly jylýmen jabdyqtaý salasyna 533 mıllıard teńge ınvestıtsııa tartyldy. Byltyr 259 shaqyrym jylý jelisi jóndelse, bıyl – taǵy 336 shaqyrym jóndeý josparlanyp otyr. Nátıjesinde ortasha tozý deńgeıi 52 48 paıyzǵa deıin tómendeıdi, apattylyq deńgeıi 7,2 paıyzǵa, al jylý shyǵyndary 1,6 paıyzǵa qysqarady.
– Osylaısha tozý deńgeıi asa joǵary tabıǵı monopolııa sýbektileriniń sany tórt kásiporynǵa azaıady. Mysaly, Pavlodar jáne Temirtaý qalalaryndaǵy magıstraldyq jylý jelilerin rekonstrýktsııalaý jobalary tolyq iske asyryldy, sondaı-aq Oral qalasynda osy baǵyttaǵy jumystar jalǵasyp jatyr, – dedi Asan Darbaev.
Aıta keteıik, Memleket basshysynyń tapsyrmasymen Úkimet «Energetıkalyq jáne kommýnaldyq sektorlardy jańǵyrtý» ulttyq jobasyn iske asyryp jatyr. Elimizdegi búkil bazalyq ınfraqurylymnyń aýqymdy qurylysy halyqtyń turmys sapasyn arttyrýǵa jáne ekonomıkanyń odan ári ornyqty ósýin qamtamasyz etýge baǵyttalǵan.
