Qazaqstannyń kólik dálizderin damytý jónindegi bastamalary EYU aıasynda qoldaý tapty
ASTANA. KAZINFORM- Astanada Ekonomıkalyq yntymaqtastyq uıymyna (EYU) múshe memleketterdiń Kólik mınıstrleriniń 14-keńesine daıyndyq aıasynda joǵary laýazymdy tulǵalardyń keńesi ótti.
Jıynda 2026–2035 jyldarǵa arnalǵan EYU-nyń kólik salasyn turaqty damytý jáne syrtqy syn-qaterlerge beıimdeý strategııasynyń jobasy men Astana deklaratsııasynyń jobasy qaraldy.
Keńeske uıymǵa múshe memleketter men EYU hatshylyǵynyń ókilderi, sondaı-aq Bas hatshynyń orynbasary Sılapberdy Nýrberdıev qatysty. Qazaqstan atynan Kólik mınıstrliginiń delegatsııasy qatysty.
Atalǵan qujattar óńirdegi kólik baılanysyn nyǵaıtýǵa jáne memleketter arasyndaǵy yntymaqtastyqty damytýǵa baǵyttalǵan.
Qazaqstan tarapy halyqaralyq kólik dálizderin úılesimdi damytý, júk tasymalynyń tıimdiligin arttyrý jáne kólik-logıstıka ınfraqurylymyn jetildirý mańyzdy ekenin atap ótti.
Talqylaý barysynda Shyǵys–Batys jáne Soltústik–Ońtústik baǵyttaryna, sonyń ishinde Transkaspıı halyqaralyq kólik baǵyty men Qazaqstan – Túrikmenstan – Iran dálizine erekshe nazar aýdaryldy.
Qazaqstan delegatsııasy mýltımodaldy tasymaldy damytý, tsıfrlyq kólik júıeleriniń ózara úılesimdiligin qamtamasyz etý, halyqaralyq kólik dálizderiniń tıimdiligin baǵalaý jáne basym ınfraqurylymdyq jobalardy aıqyndaý boıynsha usynystaryn tanystyrdy.
Qazaqstan usynǵan bastamalar qoldaý taýyp, qujat jobalaryn talqylaý kezinde eskerildi. Qatysýshylar óńirlik kólik yntymaqtastyǵyn odan ári nyǵaıtýǵa múddeli ekenin rastady.
Keńes qorytyndylary 15 qazanda Astanada ótetin EYU-ǵa múshe memleketter Kólik mınıstrleriniń 14-keńesinde usynylady.
Shyǵystanýshy Dúken Másimhanuly Almatyda ótip jatqan halyqaralyq ǵylymı-praktıkalyq konferentsııada Qazaqstan birneshe kólik dálizin ushtastyrý arqyly tranzıt múmkindigin keńeıtetini týraly aıtty.
