Qazaqstannyń kók tústi tólqujatyn jahan jurtshylyǵy jaqsy biledi jáne qurmetteıdi – Toqaev
ASTANA. KAZINFORM – Qasym-Jomart Toqaev máslıhat depýtattarynyń ІІІ respýblıkalyq forýmynda tólqujatymyzǵa halyqaralyq senim joǵary, orasan zor kúshke ıe qujat retinde moıyndalatynyn aıtty.
— Qazirgi Qazaqstan kóptegen elden kósh ilgeri. Shartarapqa ekonomıkalyq damýy ornyqty, saıası ahýaly turaqty, túrli din men mádenıetke qurmetpen qaraıtyn el retinde tanyldyq.
Biz órkenıetaralyq jáne dinaralyq dıalog órbitýdi, halyqaralyq quqyqty saqtap, beıbit qatar ómir súrýdi, ıadrolyq qarýdy taratpaı, ózara senim jáne qaýipsizdik sharalaryn nyǵaıtýdy jaqtaımyz.
Qazaqstan ulttyq múddesin, egemendigin árdaıym qorǵaıdy. Keleshekte de solaı bolmaq, — dedi Prezıdent.
Memleket basshysy azamattarymyz dúnıe júzin emin-erkin sharlap, shetelderde bilim alady, kásibin júrgizetinin aıtty.
— Biz — jasampaz ultpyz. Qarym-qatynasty qıratpaımyz, baýyrymyzǵa tartamyz. Eshkimdi jatyrqamaımyz, bólinbeımiz, birigip, tatý-tátti tirshilik etemiz.
Sondyqtan bizdiń tólqujatymyzǵa halyqaralyq senim joǵary, orasan zor kúshke ıe qujat retinde moıyndalady.Azamattarymyz dúnıe júzin emin-erkin sharlap, shetelderde bilim alady, kásibin júrgizedi. Bul elimizdiń álemniń alpaýyt memleketterimen terezesi teń, mol múmkindikterge ıe ekenine aıqyn dálel.
Biz Ádiletti Qazaqstannyń negizin qalap jatyrmyz. Bul elde kez kelgen adam áleýmettik mártebesine, saıası, ıdeologııalyq tańdaýyna, tiline, dinine, etnıkalyq shyǵý tegine qaramastan, óz qarym-qabiletin tolyq paıdalana alady.
Osy turǵydan jańa Halyq Konstıtýtsııasynyń jobasy ortaq Otanymyz — Qazaqstan Respýblıkasynyń jarqyn keleshegine berik ári myzǵymas irgetas bolady dep aıta alamyn, — dedi Memleket basshysy.
Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.
