Qazaqstannyń Qyzyl kitabyna taǵy 11 janýar túri engiziledi

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Qazaqstannyń Qyzyl kitabyna ózgerister engiziletinin málim etti.

Búgingi tańda Qazaqstandaǵy janýarlardyń sırek kezdesetin jáne joıylyp ketý qaýpi tóngen túrler tizbesinde (Qyzyl kitap – red.) 227 janýar túri tirkelgen, onyń ishinde 131 túri – omyrtqalylar jáne 96-sy omyrtqasyzdar.

– Qazirgi ýaqytta mınıstrlik Zoologııa ınstıtýtynyń bıologııalyq negizdemesimen Halyqaralyq tabıǵatty qorǵaý odaǵynyń krıterıılerine sáıkes, tizbeni jańartý jumystaryn bastady. Nátıjesinde tizimnen 21 omyrtqasyz janýar túrin shyǵarý men 6 omyrtqasyz jáne 5 omyrtqaly janýar túrin engizý usynyldy, – dedi mınıstr Úkimet úıinde ótken baspasóz máslıhatynda.

Osylaısha, úlken kóz kesirtke, ámirshi ınelik, núkteli qanqyzy, kóbelek, karmın symyrlary jáne qońyzdyń birneshe túrin Qyzyl kitaptan shyǵarý usynylyp otyr.

Al kerisinshe, qamys mysyǵy, aqbas qumaı, Tazqara, Tıan-Shan jáne Jońǵar kesirtkelerin, qysqaqanatty Koranýs shegirtkesin, kók Zıkrona qońyzyn, Qandyaǵash qandalasyn jáne saryshaıannyń birqatar túrin Qyzyl kitapqa engizý josparlanǵan.

Sondaı-aq, elimizde bıoártúrlilikti saqtap qalý sharalarynyń nátıjesinde, 2005-2023 jyldary sırek kezdesetin toǵaı buǵysy, qulan, arqar jáne qaraquıryq popýlıatsııasy kóbeıgen.