Qazaqstannyń Qytaı ınvestıtsııasyn tartý saıasaty berik ári dáıekti bolyp qala beredi — Prezıdent

ASTANA. KAZINFORM — Qazaqstannyń Qytaı ınvestıtsııalaryn keńinen tartýǵa baǵyttalǵan saıasaty berik ári dáıekti bolyp qala beredi. Bul týraly «Ortalyq Azııa — Qytaı» ІІ sammıtinde Memleket basshysy Qasym-Jomart Toqaev aıtty.

— Ortalyq Azııa memleketteriniń jıyntyq jalpy ishki ónimi jarty trıllıon dollarǵa jaqyndap keledi. Sońǵy bes jylda aımaqishilik taýar aınalymy aıtarlyqtaı ósip, 10 mıllıard dollardan asty. Ótken jyly bizdiń aımaqtyń barlyq syrtqy saýda aınalymynyń shamamen 40 paıyzy Qytaı úlesine tıesili boldy. Bul rekordtyq 95 mıllıard dollardy qurady, — dedi Prezıdent.

Memleket basshysynyń aıtýynsha, bul kórsetkishtiń 46 paıyzy Qazaqstanǵa tıesili. Qytaımen ózara taýar aınalymy 44 mıllıard dollarǵa jetti.

— Qazaqstannyń ekonomıkalyq ósiminiń mańyzdy quramdas bóligi qytaılyq ınvestıtsııalar boldy. Onyń jıyntyq kólemi 26 mıllıard dollardan asty. Qazaqstanda qytaı kapıtalynyń qatysýymen 5 myńǵa jýyq kásiporyn tabysty jumys istep tur. Munaı-gaz, hımııa, metallýrgııa, agroónerkásip, taý-ken jáne basqa da salalarda ondaǵan iri joba iske asyryldy. Qazaqstannyń Qytaı ınvestıtsııalaryn keńinen tartýǵa baǵyttalǵan saıasaty berik ári dáıekti bolyp qala beredi. Bul strategııa saıası konıýnktýraǵa ushyramaıdy, — dedi Qasym-Jomart Toqaev.

«Ortalyq Azııa — Qytaı» ІІ sammıtine Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.