Qazaqstannyń kınotýyndylary Norvegııa astanasynda kórsetildi
ASTANA. KAZINFORM — «Qazaq kınosynyń kúnderi» aıasynda Osloda kórermenderge «Jaýjúrek myń bala», «Ana týraly ańyz» jáne «Raıony» fılmderi usynyldy, dep habarlaıdy SІM baspasóz qyzmeti.
2025 jylǵy 19 qarasha men 11 jeltoqsan aralyǵynda Qazaqstannyń Norvegııadaǵy elshiligi Sháken Aımanov atyndaǵy «Qazaqfılm» ulttyq kınostýdııasymen birlesip, Oslo qalasynda «Qazaq kınosynyń kúnderin» uıymdastyrdy.
Baǵdarlama aıasynda otandyq fılmder — «Jaýjúrek myń bala», «Ana týraly ańyz» jáne «Raıony» kórsetildi.
Kórsetilimder Norvegııa astanasynyń ortalyǵynda ornalasqan belgili mádenı ortalyqtardyń biri — Cinemateket (Norsk Filminstitutt) kınoteatrynda ótti.
Kınokórsetilimderdiń tujyrymdamasy Qazaqstan tarıhyn ár túrli kezeńderde — memlekettik qalyptasý dáýirinen bastap qazirgi áleýmettik shyndyqtarǵa deıin — kórsetý ıdeıasyna negizdeldi.
Kórsetilimderge Norvegııanyń resmı, isker jáne qoǵamdyq toptarynyń ókilderi, sondaı-aq stýdentter, dıplomatııalyq mıssııa qyzmetkerleri jáne qazaq dıasporasy qatysty.
Іs-shara jergilikti kórermenderdiń Qazaqstan tarıhyna, onyń mádenı dástúrleri men qazirgi qoǵamyna degen shynaıy qyzyǵýshylyǵyn týdyryp, eki el arasyndaǵy dıalogty damytýdaǵy mundaı is-sharalardyń mańyzdylyǵyn atap kórsetti.
— Qazaq kınosynyń kúnderin ótkizý Qazaqstan men Norvegııa arasyndaǵy mádenı-gýmanıtarlyq yntymaqtastyqty damytýdaǵy mańyzdy sharalardyń biri bolyp, elderimiz arasyndaǵy mádenı baılanystardyń nyǵaıýyna serpin berdi, — delingen mınıstrlik taratqan aqparatta.
Budan buryn dál osyndaı shara Madrıdte ótken edi. Onda rejısser Ernar Nurǵalıevtiń «Alǵa» jáne rejısser Farhad Sháripovtiń «Shema» fılmderi kórsetildi.