Qazaqstannyń qazirgi alǵan baǵyty unaıdy – Qytaıdan kelgen qandas
PETROPAVL. KAZINFORM – Soltústik Qazaqstan oblysy Nıkolaevka eldi mekeni Qytaı, Iran elderinen kelgen 30 qandas otbasynyń basyn biriktirdi. Búgin olar alǵash ret atamekende daýys berip, óz tańdaýyn jasady.
Esil aýdany Nıkolaevka aýylyna qonys tepken qandastar referendým kúni tańerteń bir otbasydaı bolyp jınalyp, ulttyq kıim kıip daýys berýge keldi. Bul oqıǵa aýyl turǵyndary úshin erekshe ári tarıhı sátke aınaldy.
Toqtarbek Alashbekuly bul eldi mekenge 2023 jyly Qytaıdan bala-shaǵasymen qonys aýdarǵan. Eki kún buryn jubaıy bosanyp, dúnıege qyzy keldi.
- Áıelim Astanada bosandy, áli úıge jetken joq. 18 jastaǵy ulym Nóser jolda. Ol Astanadaǵy kolledjde qurylysshy mamandyǵyna oqyp jatyr. Keshke deıin kelip, ol da daýys beretin bolady. Ekinshi ulym áli kishkentaı. Qazaqstannyń azamaty bolǵannan keıin quqymyzdy paıdalanyp, tańerteń tańdaýymyzdy jasap keldik. Eldegi jaǵdaıdy nazarda ustap otyrmyz, elimizdiń alǵan baǵyty durys dep oılaımyn. Atamekende birinshi ret osyndaı naýqanǵa qatysyp otyrmyn. Bul kúnge de aman-esen jetkenime qýanyshtymyn, - deıdi Toqtarbek Alashbekuly.
Qazaqstanǵa qonys aýdarǵan Toqtarbek qazir tórt túliktiń basyn kóbeıtip, mal sharýashylyǵyn damytyp jatyr. Jospary kóp.
- Erinbegen adamǵa elimizde barlyq múmkindik bar ǵoı jaqsy turmys qurýǵa. Kelgen kezde eki sıyrym ǵana bolǵan, qazir shúkir, jylqylarym, qara malym, qoı-eshkim bar. Endi memlekettik baǵdarlamaǵa qatysyp, grant alyp túıe basyn kóbeıtkim keledi. Bıyl jazda aýyl mańynda eki kıiz úı quryp, bıe baıladym. Jaz boıy qurt, maı, irimshik sattyq, - deıdi qandas.
Búginde Nıkolaevka aýylynda shetten kóship kelgen 35 otbasy, 200-ge jýyq adam turyp jatyr. Olardyń ishinde qandastardan bólek, elimizdiń ońtústik óńirlerinen kelgender de bar.
Qonys aýdarǵandardyń basym bóligi mal sharýashylyǵymen aınalysyp, aýyldyń turmysyn jaqsartýǵa úles qosyp keledi. Olar jańa jerde tamyr jaıyp, turmysyn túzep qana qoımaı, qoǵam ómirine de belsene aralasyp jatyr.
Buǵan deıin Shyǵys Qazaqstanda bir top áje ándete kelip daýys bergenin jazǵan edik.
