Qazaqstannyń qaı jerinde kúrish ósirýge bolady jáne dıqandar bıyl sýdy qalaı paıdalanbaq
ASTANA.KAZINFORM - Bıyl vegetatsııa kezeńinde sý resýrstaryn ádil bólý jáne durys paıdalaný maqsatynda Sý resýrstary jáne ırrıgatsııa mınıstrligi Qazaqstannyń ońtústik óńirleri úshin turaqty sýarýǵa arnalǵan sý paıdalaný lımıtterin bekitti.
Mınıstrliktiń baspasóz qyzmetiniń habarlaýynsha, bekitilgen lımıtterge sáıkes, Qyzylorda oblysyna – 3,2 mlrd tekshe metr, Túrkistan oblysyna – 3,8 mlrd tekshe metr, al Jambyl oblysyna 900 mln tekshe metr sý kólemi qarastyrylǵan.
Eske sala keteıik, byltyr Premer-mınıstrdiń orynbasary Qanat Bozymbaevtyń tóraǵalyǵymen elimizdiń ońtústik óńirlerinde vegetatsııa kezeńine daıyndyq máseleleri boıynsha kóshpeli keńester ótken bolatyn.
Sharýalarmen ótken kezdesýlerde sý tutyný lımıtterin qatań saqtaý, ylǵal kóp qajet etetin daqyldardyń egis kólemin qysqartý, egis qurylymyn ártaraptandyrý jáne sý únemdeý tehnologııalaryn mindetti túrde engizý qajettigi erekshe atap ótildi.
Lımıtterdiń saqtalýyn qamtamasyz etý maqsatynda egis qurylymyn ártaraptandyrý jáne ylǵal kóp qajet etetin daqyldar kólemin azaıtý sharalary kózdelgen. Sonymen qatar sýarmaly sýdy paıdalaný qaǵıdalary bekitilip, ósiriletin daqyldardy óz betinshe ylǵal kóp qajet etetin túrlerge aýystyrǵan jáne tıisti kelisimshartsyz sý paıdalanǵan aýyl sharýashylyǵy taýar óndirýshilerine qatysty sanktsııalar engizilgen.
2026 jylǵy vegetatsııa kezeńinde Túrkistan oblysynda kúrish egisiniń kólemi 3,5 myń gektardan aspaýy tıis.
Sondaı-aq «Dostyq» memleketaralyq kanaly boıynda kúrish egýge tyıym salynǵan. Kúrishti tek «Qyzylqum» kanaly boıynda jáne sý únemdeý tehnologııalaryn qoldaný arqyly ósirýge ruqsat etiledi.
Qyzylorda oblysynda kúrish egisiniń kólemin 70 myń gektar deńgeıinde saqtaý josparlanǵan. Al Almaty oblysynda bul kórsetkish 5,8 myń gektardan, Jetisý oblysynda 1 myń gektardan aspaýy tıis.
-Lımıtter Qazgıdromettiń gıdrologııalyq boljamdaryna, jyl boıy túsken jaýyn-shashyn kólemine jáne transshekaralyq ózenderdiń kútiletin sý deńgeıine súıene otyryp esepteldi. Jalpy alǵanda, 2026 jylǵy vegetatsııa kezeńi turaqty bastaldy. Qazirgi ýaqytta mınıstrlik mamandary, basseındik sý ınspektsııalary jáne «Qazsýshar» fılıaldary bekitilgen sý lımıtteriniń saqtalýyn jáne egis qurylymyn baqylaýda ustap otyr, – dedi Sý resýrstary jáne ırrıgatsııa birinshi vıtse-mınıstri Nurlan Aldamjarov.
Osyǵan deıin bıyl balyq sharýashylyǵyn damytý úshin 400-den astam sý aıdyny bekitilgeni týraly jazdyq.
