Qazaqstannyń qaı óńirinde qoqys úıindisi kóp
2023 jyldyń mamyr aıynan beri elde 5 578 qoqys orny anyqtalyp, onyń 50% joıyldy. Bul týraly Ekologııa jáne tabıǵı resýrstar mınıstri Erlan Nysanbaev aıtty, dep habarlaıdy QazAqparat tilshisi.
Ǵaryshtyq monıtorıng málimetinshe, 2022 jyly anyqtalǵan zańsyz qoqys oryndary tolyǵymen joıylǵan joq, joıylǵan bóligi – 77%.
«Qoqys oryndarynyń eń kóp sany Qaraǵandy, Aqmola oblystarynda jáne Astana qalasynda ekeni anyqtaldy. Qoqys oryndaryn joıý jumystary Abaı (10%), Ulytaý (15%) oblystarynda jáne Astana qalasynda nashar júrgizilip jatyr», - dedi Ekologııa mınıstri Úkimettiń búgingi otyrysynda.
2023 jyldyń mamyr aıynan beri 5 578 qoqys orny anyqtalyp, onyń 50% ǵana joıylǵan. Sondaı-aq joıý boıynsha jumys deńgeıiniń tómen ekeni baıqaldy: Abaı jáne Mańǵystaý oblystarynda – 16%, Ulytaý oblysynda – 20 %, Astana qalasynda 30 % boldy.
«Ótken beısenbide ǵana joıý deńgeıi 44% bolǵanyn atap ótkim keledi. ıAǵnı, qysqa merzimde 330-ǵa jýyq zańsyz qoqys joıyldy. Zańsyz qoqys oryndarynyń paıda bolýynyń negizgi sebepteri kommýnaldyq jáne qurylys qaldyqtarymen durys jumys istemeý bolyp otyr. Bul ákimdikterdiń jumys deńgeıiniń tómendigin, qurylys qaldyqtaryn basqarý jónindegi talaptardyń saqtalýyn baqylaýdyń tómendigin kórsetedi», - dedi Erlan Nysanbaev.
Óz kezeginde Astana ákimi Jeńis Qasymbek elordadaǵy zańsyz qoqys úıindileriniń basym kópshiligi qurylys qaldyqtary ekenin aıtty.
«Ótken jyly 551 ruqsat etilmegen qoqys úıindisi tirkeldi. Onyń 294-i bir jyl ishinde joıyldy. Alaıda jyl basynan 80 jańa oshaq paıda boldy. Búginde ǵarysh monıtorıngimen 338 ruqsat etilmegen qoqys úıindisi tabylyp, onyń 113-i joıyldy, 65 myń tonnaǵa jýyq qoqys shyǵaryldy. Bıylǵy sáýir aıynda qurylys qoqystaryn qabyldaý alańy ashylǵanyna qaramastan, stıhııalyq qoqys úıindileriniń kópshiligi áli qurylys qoqystaryn zańsyz shyǵarý saldarynan qalyptasyp otyr. Jyl basynan beri polıtsııamen birlesip, 6,5 myńnan astam sýbekti ákimshilik jaýapqa tartyldy. Aldaǵy toqsanda taǵy 100-den astam zańsyz qoqys úıindisin joıýdy josparlap otyrmyz», - dedi elorda ákimi.
