Qazaqstannyń qaı óńirinde balany mektepke daıyndaý arzanǵa túsedi
ASTANA. KAZINFORM — Balany mektepke daıyndaý shyǵyny elimizdiń ár qalasynda ártúrli. Mektep formasy, aıaq kıim, sómke men keńse taýarlarynyń baǵasy sapasy men saýda ornyna, óndirýshi kompanııaǵa tikeleı baılanysty, dep habarlaıdy Kazinform agenttiginiń tilshisi.
Mektep taýary qaıda arzan, al qaıda qymbat
Qazaqstan qalalary arasynda Petropavlda baǵa tómen. Orta eseppen 22 myń teńgeden bastalady. Odan ári Atyraý qalasynda 25 myń, Tarazda 27 myń, Pavlodar men Semeı qalalarynda 30 myń teńge jáne odan joǵary qarjy qajet bolady.
Al baǵa Astana qalasynda joǵary. Munda ata-analar bir balaǵa 240 myń teńgege deıin jumsaıdy. Almaty qalasynda 215 myń, Shymkentte 188 myń, al Qaraǵandy qalasynda 185 myń teńgege deıin jetedi.
Esepteı kele eń arzany men eń qymbatynyń arasyndaǵy aıyrmashylyq shamamen 11 esege jetkenin kórýge bolady.
Ár sanattaǵy tómen jáne joǵary baǵa
Eger ár sanatta taýar baǵasyn salystyrsaq, aıyrmashylyqtyń aıtarlyqtaı joǵary ekenin kóremiz.
Mektep formasy. Tómen baǵa Petropavl qalasynda tirkeldi. Munda mektep formasyn 9 myń teńgege salyp alýǵa bolady. Al Astana qalasynda 80 myń teńgege deıin jetti. Shymkent qalasynda qymbat kıimdi 78 000 teńgege satyp alsa, almatylyqtar 75 000 teńge jumsaıdy.
Aıaq kıim. Petropavlda aıaq kıimdi 4 000 teńgege de satyp alýǵa bolady, al astanalyqtar keıde 70 000 teńge de jumsaýy múmkin. Óńirler tiziminde Qyzylorda qalasy erekshelenip tur. Munda eń arzan aıaq kıim baǵasy 20 000 teńgeden bastalady.
Sómke. Eń arzany Shymkent qalasynda satylady. Baǵasy 3 000 teńgeden bastalady. Sonymen birge Kókshetaý qalasynda da sómkeni 3 500 teńgege satyp alýǵa bolady. Eń joǵary baǵa 50 000 teńgege deıin jetti. Qymbat sómkeler Astana, Almaty men Qaraǵandy qalalarynda satylady.
Keńse taýary. Ata-ana bir balaǵa arnalǵan mektep quralyna kem degende 5 000 teńge jumsaıdy. Al Astana, Aqtóbe, Qaraǵandy, Jezqazǵan men Shymkent qalalarynda keńse taýaryn jınaqtaýǵa 40 000 teńge kerek.
Qorytyndylaı kele, mektepke qajetti keńse taýaryn jınaqtaý úshin kem degende bir balaǵa 5 000 teńge jumsalady. Al Astana qalasynda eń arzanyn tańdasa 10 000 teńge qajet bolady.
Mektepke daıyndaýǵa keminde qansha qarajat qajet?
Mektep formasy, aıaq kıim, sómke jáne keńse taýarlaryn, ıaǵnı, bir oqýshyǵa arnalǵan jıyntyqty eseptep, arzan óńirlerdi anyqtadyq.
Qolda bar derekterge súıensek, Petropavlda — 22 myń teńge. Bul somaǵa 9 myń teńgeden bastalatyn mektep formasy, 4 myń teńgelik aıaq kıim, 4 myń teńgelik sómke jáne 5 myń teńgeden bastalatyn keńse taýary kiredi.
Eń tómengi baǵa tiziminiń ekinshi ornynda Atyraý qalasy tur. Munda bir oqýshyny mektepke daıyndaýǵa 25 myń teńge de jumsaýǵa bolady. Odan keıin Taraz qalasy. Oqýshyǵa qajetti qarjy kólemi — 27 myń teńge. Pavlodar men Semeıde jıyntyq quny shamamen — 30 myń teńge.
Al Qyzylordada jıyntyqtyń eń tómengi quny 57 myń teńgeni quraıdy. Bul balany mektepke daıyndaýda arzanǵa túsetin óńirlerdiń ishinde tirkelgen eń joǵary kórsetkish. Buǵan aıaq kıimniń baǵasy keri áser etip tur. Munda eń arzany — 20 myń teńge.
Astanada baǵa joǵary. Alaıda bir balaǵa 45 myń teńge de jumsaýǵa bolady. Qaraǵandy men Jezqazǵanda da eń tómengi jıyntyq somasy — 45 myń teńge.
Eń joǵary bıýdjet 240 myń teńgege deıin jetti
Eger taýarlardy tańdap, unaǵany men sapalysyn ǵana satyp alsa, baǵa sáıkesinshe óse beredi. Óńirler arasyndaǵy aıyrmashylyq ta alshaqtaıdy.
Astanada bir balaǵa 240 000 teńge de jumsaıdy. Onyń ishinde mektep formasy 80 myń teńge, aıaq kıim 70 myń, sómke 50 myń jáne keńse taýarlary 40 myń teńgege deıin barýy múmkin.
Almatyda eń qymbaty 215 myń teńgeni quraıdy. Shymkentte — 188 myń, Qaraǵandyda — 185 myń, Jezqazǵanda — 180 myń teńge.
Tolyq jıyntyqtyń eń tómengi joǵarǵy shegi Atyraýda baıqaldy. Qajetti soma — 100 myń teńge. Kókshetaýda bul kórsetkish — 101,5 myń teńge, Qostanaıda — 120 myń, Tarazda — 120 myń teńge.
Elimizde oqýshyny jańa oqý jylyna daıyndaý quny óńirlerge qaraı ózgerip otyrǵanyn kóremiz. Eń tómeni Petropavlda. Munda 22 myń teńgeden bastalsa, Qyzylordada 57 myń teńgege deıin jetti.
Al baǵasy joǵary óńirlerdiń tizimin Atyraý bastaıdy. Munda 100 myń teńge. Al Astanada 240 myń teńgege deıin jetti.
Balasyn mektepke daıyndaǵan kezde arzan ári qoljetimdi jıyntyq quny shamamen 22–57 myń teńge bolady. Al taýar eń joǵarysy 100 000 teńgeden bastalyp, 240 myń teńgege deıin ósýi múmkin.
Aıta keteıik, naqty shyǵyn tańdaýǵa qaraı ózgeredi. Sebebi syrt kıim, sporttyq kıim, aýystyryp kıetin ekinshi aıaq kıim sekildi ózge de qajettilikter bul tizimge kirmedi. Kerek-jaraq ózgerse, qosymsha shyǵyn bolady.
Buǵan deıin Qazaqstandaǵy jeke mektepterde oqý aqysy týraly jazyldy.
Sonymen birge 2026–2027 oqý jylynyń mektep formasyna qatysty negizgi talaptar aıtyldy.
