Qazaqstannyń qaı óńirinde aýyz sýdyń sapasy nashar

Sý resýrstary jáne ırrıgatsııa mınıstri Nurjan Nurjigitov elimizdiń qaı óńirinde aýyz sý sapasy nashar ekenin aıtty, dep habarlaıdy Kazinform.

«Aýyz sýǵa únemi monıtorıng júrgiziledi. Eger ol ishýge jaramsyz bolsa, qoldanylmaıdy. Aýyz sý nashar ári ony ishýge bolmaıdy dep aıta almaımyz. Óıtkeni, qatań baqylaý júrgiziledi. Jalpy, júıe durys jumys istep tursa, onda onyń sapasy jaqsy bolady», — dedi mınıstr ortalyq kommýnıkatsııalar qyzmetindegi baspasóz máslıhatynda.

Osy oraıda BAQ ókilderi elimizdiń qaı óńirinde aýyz sýdyń sapasy nashar ekenin surady.

Saýalǵa jaýap bergen mınıstr aýyz sý sapasyna qatysty keıbir óńirde problema baryn jasyra almady.

«Olar — Ortalyq jáne Batys Qazaqstan. Bul jaqta shynymen de aýyz sýmen qamtamasyz etýde problema bar. Ońtústik jáne shyǵys óńirlerde jaǵdaı birshama jaqsy», — dedi Nurjan Nurjigitov.