Qazaqstannyń qaı óńirlerinen sırek metaldar tabyldy
ASTANA. KAZINFORM — Qazaqstanda sırek kezdesetin metaldar qory bar 10 ýchaskede barlaý jumystary aıaqtaldy.
Ónerkásip jáne qurylys mınıstrligi Geologııa komıtetiniń tóraǵasy Erlan Aqbarov bul aýmaqtarda geologııalyq barlaý jumystarymen qandaı kompanııalar aınalysatynyn aıtyp berdi.
— Úkimet tapsyrmasyna sáıkes, biz jer qoınaýyn memlekettik geologııalyq zertteý aıasynda 12 jerde jumys júrgizdik. Onyń 10-ynda barlaý jumystary aıaqtaldy. Biz tapqan eń iri aýmaq — Kúırektikól ýchaskesi, munda sırek metaldardyń shamamen 20 mln tonna óndiristik qory bar, — dedi Erlan Akbarov Úkimette ótken brıfıngte.
Basqa óńirlerde de tantal men nıobıı sııaqty sırek metaldar tabylyp, memlekettik esepke alynǵan. Dálirek aıtqanda, Ońtústik Qazaqstanda 3, Shyǵys Qazaqstan oblysynda — 2, Soltústik Qazaqstanda — 3 nysan bar.
— Biz izdestirý-baǵalaý jumystaryn aıaqtadyq. Endi barlaý jumystaryn júrgizý qajet. Ári qaraı bul jumystarmen naqty ınvestorlar aınalysady. Qazir bul ýchaskelerdi «Taý-Ken Samuryq» kompanııasyna berý máselesi qaralyp jatyr. Bul sheshimderdiń bir nusqasy, — dep atap ótti komıtet basshysy.
Sondaı-aq, spıker Koreı geologııa ınstıtýtymen (KIGAM) birlesip, Shyǵys Qazaqstan oblysynda lıtıı ken oryndaryn tapqanyn aıtty. Qazirgi tańda barlaý jumystaryn júrgizý jóninde kelissózder júrip jatyr.
— Onda lıtıı men oǵan ilespe sırek metaldar qory bar. Qor bar jerde bizdiń de úles bolady. «Taý-Ken Samuryq» kompanııasynyń da belgili bir úlesi bolýy múmkin, — dedi Erlan Aqbarov.
Sonymen birge, buǵan deıin kanadalyq kompanııanyń Qazaqstanda geologııalyq barlaý júrgizýge lıtsenzııa alǵany habarlanǵan edi.
— Kanadalyq kompanııa «birinshi kelý» qaǵıdatymen barlaýǵa lıtsenzııa aldy. Onda qazaqstandyq taraptyń úlesi joq. Olar barlaýdy ózderi júrgizip, kendi de ózderi óndiretin bolady, — dep tolyqtyrdy komıtet tóraǵasy.
Aıta keteıik, Qazaqstan sırek jer elementteri boıynsha álemdik ondyqqa kirýi múmkin.
Sondaı-aq, eksporttyq shekteýler sırek jer elementteriniń baǵasyn sharyqtatyp jibergen.