Qazaqstannyń qaı óńirlerinde muǵalim tapshy

Qazaqstannyń bilim berý salasynda – mektepke deıingi, orta, tehnıkalyq jáne kásiptik bilim berý uıymdarynda 500 myńǵa jýyq pedagog jumys isteıdi. Qaraǵandy, Atyraý, Aqmola, Almaty, Aqtóbe oblystarynda muǵalimderdiń tapshylyǵy baıqalady, dep habarlaıdy QazAqparat.

QR Oqý-aǵartý mınıstrliginiń habarlaýynsha, búginde Qazaqstan mektepterinde 340 958 muǵalim jumys isteıdi. Onyń 274 myńy áıelder, 66 myńy – er adamdar. Eńbek ótili 10 jylǵa deıingi muǵalimder – 139 myń, 10 jyldan 20 jylǵa deıin – 98 myń, 20 jyldan 30 jylǵa deıin – 64 myń, 30 jyldan joǵary – 39 myń muǵalim bar.

Sondaı-aq, tehnıkalyq jáne kásiptik bilim berý nysandarynda 36 315 oqytýshy qyzmet etedi. Onyń 24 myńy áıelder bolsa, 11 860-y erler. Eńbek ótili 10 jylǵa deıingi muǵalimder – 19 myń, 10 jyldan 20 jylǵa deıin – 8 myń, 20 jyldan 30 jylǵa deıin – 5 myń, 30 jyldan joǵary – 3521 oqytýshy bar.

Mektepke deıingi uıymdarda pedagogter sany – 97 188. Onyń arasynda 94 648 áıel, 2 540 er adam bar. Eńbek ótili 10 jylǵa deıingi pedagog – 64 myń, 10 jyldan 20 jylǵa deıin – 20 myń, 8 jyldan 30 jylǵa deıin – 5 myń, 30 jyldan joǵary – 4 myń tárbıeshi bar.

Sonymen birge, Oqý-aǵartý mınıstrliginiń habarlaýynsha, Qaraǵandy, Atyraý, Aqmola, Almaty, Aqtóbe oblystarynda muǵalimderdiń tapshylyǵy baıqalady. Pánder boıynsha – elimizde matematıka, bastaýysh synyp, orys tili jáne ádebıeti, fızıka, hımııa jáne aǵylshyn pánderinen muǵalimder jetispeıdi.

Aıta keteıik, bıyl alǵash ret Muǵalimder kúni merekesi 5 qazanda merekelenedi. Osy ýaqytqa deıin respýblıkada Muǵalimder kúni qazan aıynyń birinshi jeksenbisinde toılanyp keldi. Endi bul mereke 5 qazanda álemniń 100-den astam eli atap ótetin Dúnıejúzilik muǵalimder kúnimen sáıkestendirildi.

Memleket basshysynyń bastamasymen 2019 jyly pedagogterdiń mártebesi jeke zańmen bekitildi.

Tórt jyl ishinde mektep muǵalimderiniń jalaqysy eki ese ósti. 220 myńǵa jýyq ustaz taǵaıyndalǵan sanaty úshin 50%-ǵa deıin ústemeaqy alady. Óndiristen tartylǵan tehnıkalyq jáne kásiptik bilim berý pedagogteri jalaqysyna 35%-ǵa deıin qosymsha aqy alady. Bıylǵy qyrkúıek aıynan bastap 97 myń tárbıeshiniń jalaqysy taǵy 30%-ǵa kóterilgen.

Sondaı-aq, keshe astanalyq muǵalimderge kásibı merekesinde syılyq jasaýǵa tyıym salyndy. Qalalyq bilim basqarmasy bilim berý uıymdarynyń ata-analardan syı-sııapat alýyna tyıym salatyn buıryq shyǵardy.