Qazaqstannyń qaı óńirlerinde eski úıler kóp

ASTANA. KAZINFORM – Qazaqstanda qulaǵaly turǵan eski úıler sany qaı óńirlerde kóp ? Bul saýalǵa QR Ónerkásip jáne qurylys mınıstrligi jaýap berdi.

- Jergilikti atqarýshy organdardyń málimetteri boıynsha, elde 1031 eski kópqabatty úı bar, - delingen mınıstrliktiń habarlamasynda.

Bul rette qulaǵaly turǵan úılerdiń eń kóbi eki qala men bir oblysta tirkelgen.

- Bul rette kósh bastap turǵan óńir - Atyraý oblysy. Munda 217 kópqabatty úı ábden tozǵan. Ekinshi orynda Astana tur. Munda 206 úıdiń tozyǵy jetken. Al Shymkentte osy sanattaǵy 108 úı bar, - delingen vedomstvonyń habarlamasynda.

Mınıstrliktiń málimetinshe, Memleket basshysynyń tapsyrmasyna sáıkes, 2029 jylǵa deıin apatty jáne tozyǵy jetken turǵyn úı qorynyń shamamen 40 myń menshik ıesin jańa baspanamen qamtamasyz etý qajet.

Bul maqsatta QR Úkimetiniń 2022 jylǵy 23 qyrkúıektegi №736 qaýlysymen 2023–2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy bekitildi.

Atalǵan tujyrymdama aıasynda óńirlerde jóndeý jumystary boıynsha baǵdarlamalar júzege asyrylyp jatyr. Jergilikti atqarýshy organdar Tujyrymdamany iske asyrý jumystaryn kúsheıtýmen qatar, apatty jáne tozyǵy jetken turǵyn úı ıelerin baspanamen qamtamasyz etýdi jedeldetý úshin túbegeıli sharalar qabyldaıtyn bolady.

Osyǵan deıin Qazaqstanda ekinshi naryqtaǵy turǵyn úıge arnalǵan tsıfrlyq ıpoteka iske qosylatyny týraly jazdyq.