Qazaqstannyń qaı oblysynda shıpajaı kóp
ASTANA. KAZINFORM — Qazaqstanda shıpajaılar men sanatorıı-kýrorttyq uıymdardyń biryńǵaı tizilimin qurý josparlanyp otyr. Qazir elimizde osyndaı 333 mekeme jumys isteıdi. Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarınniń depýtattyq saýalǵa bergen jaýabynda aıtylǵan.
Ulttyq statıstıka bıýrosynyń málimetinshe, sanatorıı-kýrorttyq uıymdardyń eń kóbi Túrkistan oblysynda ornalasqan. Munda 117 mekeme bar. Almatyda — 34, Almaty oblysynda — 22, Astana men Aqmola oblysynda 20 mekeme jumys isteıdi. Shymkentte 20, Qyzylorda oblysynda — 17, Jambyl oblysynda — 16, Qaraǵandy oblysynda 13 sanatorıı-kýrorttyq uıym bar.
Serik Jumanǵarınniń jaýabynda shıpajaılardyń basym bóligi jeke menshikke tıesili ekeni atap ótilgen. Osyǵan baılanysty qoldanystaǵy esep júıesi olardyń materıaldyq-tehnıkalyq bazasy, nómirlik jáne tósek-oryn qory, júktemesi men tabıǵı emdik resýrstardy paıdalaný deńgeıi týraly tolyq málimet bermeıdi.
Bul máseleni sheshý úshin Úkimet sanatorıı-kýrorttyq uıymdardyń biryńǵaı reestrin jasaýdy kózdeıtin zańnamalyq túzetýler ázirledi. Qazir olar densaýlyq saqtaý máseleleri jónindegi zań jobasy aıasynda qaralyp jatyr.
Úkimettiń paıymdaýynsha, biryńǵaı reestr shıpajaılar týraly málimetterdi júıelep, osy salanyń qazirgi jaǵdaıyn neǵurlym tolyq baǵalaýǵa múmkindik beredi.
Buǵan deıin Quryltaı depýtaty E. Smolıakova Qazaqstannyń kýrorttyq áleýetin damytý máselesin kótergen edi.
