Qazaqstannyń qaı qalasynda kólik saqtandyrý baǵasy tómen
ASTANA. KAZINFORM – Qazaqstan qalalarynda kólikti saqtandyrý baǵasy 4 100 teńgeden bastalyp 90 000 teńgege deıin jetti. Bir óńirdiń ózinde de júrgizýshiniń sanatyna qaraı baǵa ózgerip otyrady, dep habarlaıdy Kazinform tilshisi.
Qazaqstanda kólik ıelerine arnalǵan saqtandyrý baǵasy óńirler men júrgizýshi sanatyna qaraı ózgeredi. Eń tómeni men joǵarysynyń arasyndaǵy aıyrmashylyq birneshe ondaǵan myń teńgege deıin jetedi. Sonyń ishinde eki jyldyq tájirıbesi bar úshinshi sanatty júrgizýshiniń saqtandyrý aqysynda aıyrmashylyq joǵary. Qazaqstannyń qalalarynda dál osy sanattaǵy saqtandyrý baǵasy 10 900 teńgeden bastalyp 90 000 teńgege jetti.
Eń joǵary baǵa Qyzylorda qalasynda anyqtaldy. Saqtandyrý quny — 90 000 teńge. Úshinshi sanattaǵy júrgizýshi úshin polıs baǵasy Astana qalasynda 70 000 teńge, Qostanaıda 60 000 teńge, al Qaraǵandy, Jezqazǵan men Qonaevta 50 000 teńgeden.
Úshinshi sanatty júrgizýshige arnalǵan saqtandyrý aqysy Almatyda 48 000 teńge, al Petropavl men Túrkistanda 45 000 teńge, Tarazda 43 000 teńge, Shymkentte 42 000 teńge, al Taldyqorǵanda 40 000 teńge.
Ózge qalalarda baǵa tómen. Semeıde 35 000 teńge, Óskemende 32 000 teńge, Pavlodarda 30 000, Kókshetaýda 27 000 teńge, Aqtóbede 25 000, Aqtaýda 18 000, Oralda 15 000 teńge jáne Atyraý qalasynda eń tómen baǵa – 10 900 teńge.
Al 15-20 jyldyq tájirıbesi bar ári jol erejesin saqtaıtyn 13-sanatty júrgizýshi úshin saqtandyrý polısiniń baǵasy tómen. Dál osy sanattaǵy júrgizýshi Qyzylorda qalasynda 30 500 teńge tóleıdi. Al Astana men Oralda saqtandyrý quny – 30 000 teńge.
Taldyqorǵanda 13-sanattaǵy júrgizýshiniń polıs baǵasy 20 000 teńge. Almaty, Aqtaý, Túrkistan men Qonaevta baǵa 18 000 teńge, Kókshetaý, Óskemen men Semeıde 17 000 teńge. Shymkentte baǵa 16 500, Tarazda 16 000, Qostanaıda 15 000, al Pavlodarda 14 000 teńge.
Aqtóbe men Jezqazǵanda saqtandyrý quny 13 000 teńge, Qaraǵandyda 11 000 teńge. Eń tómen baǵa Atyraý qalasynda tirkeldi. Munda dál osy sanatqa 4 100 teńge esepteledi.
Demek 3-sanattaǵy júrgizýshiniń saqtandyrý polısiniń baǵalary arasyndaǵy aıyrmashylyq – 79 100 teńge. Atyraýda 10 900 teńge bolsa, Qyzylordada 90 000 teńge bolyp tur.
13-sanattaǵy júrgizýshi polısiniń eń tómen jáne eń joǵary baǵasy arasyndaǵy aıyrmashylyq – 26 400 teńge. Baǵa 4 100 teńgeden bastalyp,30 500 teńgege jetedi.
Buǵan deıin Kazinform páterdi saqtandyrý aqysyn salystyrdy.
