Qazaqstannyń qaı qalasynda balmuzdaq baǵasy joǵary
ASTANA. KAZINFORM – Elimizde balmuzdaq quny ósti. Tipti eń tómen jáne eń joǵary baǵa arasyndaǵy aıyrmashylyq myń teńgeden asady, dep habarlaıdy Kazinform agenttiginiń tilshisi.
Jazdyń aptap ystyǵynda balmuzdaqqa suranys artady. Suranysqa saı baǵasy da ózgerip tur. Biz eń tanymal eki túrin, ıaǵnı, vaflı staqandaǵy plombır men eskımonyń baǵasyn salystyryp, qaı qalada arzan, qaı óńirde qymbat ekenin bildik.
Plombırdiń baǵasy – 135-950 teńge aralyǵynda
Plombırdiń eń arzany Pavlodar qalasynda satylady. Munda balmuzdaq quny 135 teńgeden bastalady. Eń tómen baǵa usynǵan qalalardyń qataryna Taldyqorǵan (150 teńge), Shymkent (175 teńge) jáne Atyraý (200 teńge) da endi.
Oral, Aqtóbe, Petropavl, Qostanaı, Qaraǵandy, Astana, Almaty, Óskemen, Semeı, Taraz, Jezqazǵan jáne Túrkistan qalalarynda baǵa ortasha. Bul óńirlerde plombırdiń eń tómengi baǵasy – 215-320 teńge aralyǵynda.
Qyzylorda, Kókshetaý, Aqtaý jáne Qonaev qalalarynda baǵa joǵary. Máselen, Qonaevta vaflı staqandaǵy plombır 390-890 teńge aralyǵynda satylsa, Aqtaýda onyń baǵasy – 380-750 teńge shamasynda.
Al eń qymbat balmuzdaq Shymkentke satylady. Munda plombırdiń baǵasy keı jerlerde 950 teńgege deıin jetti.
Eskımo: baǵa aıyrmashylyǵy 1 590 teńgege jetti
Eskımo balmuzdaǵynyń baǵa aıyrmashylyǵy tipti joǵary. Bul tátti deserttiń eń arzan túri Taldyqorǵanda satylady. Quny 210 teńgeden bastalady. Sonyń ishinde Aqtaý, Qostanaı, Taraz, Shymkent, Qyzylorda jáne Atyraý qalalarynda baǵa tómen.
Oral, Pavlodar, Petropavl, Kókshetaý, Qaraǵandy, Semeı, Túrkistan, Aqtóbe, Almaty jáne Astanada baǵa ortasha. Bul qalalarda eskımo baǵasy 440-700 teńgeden bastalady.
Baǵa Jezqazǵan, Óskemen jáne Qonaev qalalarynda joǵary. Qonaevta keıbir eskımonyń baǵasy 1 800 teńgege deıin jetti. Baǵa Astana qalasynda da dál osylaı joǵary.
Jalpy el boıynsha eskımo baǵasynyń 210 teńgeden bastalyp, 1 800 teńgege deıin jetedi. ıAǵnı aıyrmashylyq 1 500 teńgeden asady.
Sapaly balmuzdaqty qalaı tańdaýǵa bolady?
Epıdemıolog dárigerler balmuzdaqty muqııat tańdaýǵa keńes beredi.
Tańdaý talaptary:
– qaptamasy bútin bolýy shart;
– daıyndalǵan kúni men jaramdylyq merzimin tekserý;
– quramyn muqııat oqý, sút, kilegeı jáne sary maı qosylǵan ónimderdi tańdaý;
– qaıta muzdatylǵan belgisi bar balmuzdaqty satyp alýǵa bolmaıdy;
– saqtaý talaptaryna mán berý kerek jáne muzdatqyshtaǵy temperatýra mınýs 18 gradýstan joǵary bolmaýy tıis.
Sarapshylardyń aıtýynsha, qaptamanyń búlinýi, muz krıstaldarynyń bolýy nemese ónim pishininiń ózgerýi saqtaý talaptarynyń buzylǵanyn bildirýi múmkin. Mundaı balmuzdaqty satyp almaǵan jón.
Baǵa aıyrmashylyǵyna qaramastan balmuzdaq qazaqstandyqtardyń eń súıikti táttisi bolyp qala bermek. Al mamandar desert tańdaǵanda tek baǵasyna ǵana emes, ónim sapasyna da mán berýge keńes beredi.
Buǵan deıin Qazaqstandaǵy qulpynaı baǵasyn bildik.
