Qazaqstannyń qaı qalalarynda zamanaýı perzenthanalar salynady

ASTANA. KAZINFORM – Elimizdiń 18 oblysynda perzenthanalar jańǵyrtylyp jatyr. Bul týraly Densaýlyq saqtaý mınıstri Aqmaral Álnazarova búgingi Úkimet otyrysynda aıtyp berdi.

– 18 oblystyq perınataldyq ortalyq jəne 15 oblystyq balalar aýrýhanalarynyń renovatsııa jumystary bastaldy. Renovatsııa maqsaty – perınataldyq ortalyqtardyń quramyn biryńǵaı jasaqtap, mamandar biliktiligin arttyrý men materıaldyq-tehnıkalyq bazasyn jaqsartý arqyly ozyq tehnologııalardy óńirlerge taratý. Sonymen birge, balalarǵa medıtsınalyq kómektiń qoljetimdiligin arttyrýǵa baǵyttalǵan 302 asa qajetti beıindi tósek qaıta quryldy. Medıtsınalyq uıymdar quramynda trenıng ortalyqtary men quzyretti damytý ortalyqtary ashylady, – dedi A. Álnazarova.

Sonymen birge, Prezıdent tapsyrmasy boıynsha zamanaýı perınataldyq ortalyqtar qurylysynyń 12 jobasy anyqtaldy (Astanada ekeý, Almaty, Shymkent, Atyraý, Taraz, Qaraǵandy, Qaskeleń, Qostanaı, Qyzylorda, Oral qalalarynda jáne Túrkistan oblysynyń Temirlan aýylynda).

– Búgingi kúni barlyq ákimdikter jer telimderin bóldi. Jobalyq-smetalyq qujattamany ázirlep, keıin basqa óńirlerde qaıta qoldaný úshin Shymkent (jyly óńirler úshin), Qaraǵandy (sýyq óńirler úshin) pılottyq jobalar aıqyndaldy. Alaıda, atalǵan óńirlerdiń ákimdikteri pılottyq jobalyq-smetalyq qujattamany ázirleýdi aıaqtaǵan joq, sol sebepti memlekettik saraptamadan ótkizý men jobany odan ári júrgizý keshiktirilip jatyr, – dep túsindirdi Densaýlyq saqtaý mınıstri.

Aıta keteıik, jyl basynan beri elimizde ana óliminiń kórsetkishi 10%-ǵa, náreste ólimi kórsetkishi 26%-ǵa tómendedi.

Aýyldyq jerlerde joǵary syn-qater tobyndaǵy júkti áıelderdi emdeýge jatqyzýǵa, asqynǵan bosanýdan keıingi kezeńde áıelderdi ońaltýǵa arnalǵan «Salaýatty ana» pansıonattary ashylyp jatyr.

Buǵan deıin Aqmaral Álnazarova aýyldyq jerlerdegi medıtsınalyq kadr tapshylyǵy máselesi qalaı sheshiletinin aıtyp bergen edi.