Qazaqstannyń qaı aımaǵynda Aıaz ata men Aqshaqar qyzmeti qymbat
ASTANA. KAZINFORM — Jańa jyl qarsańynda qazaqstandyqtar Aıaz ata men Aqshaqar shaqyryp, balalaryn qýyntady. Qyzmet kórsetýdiń bul túri qazir joǵary suranysqa ıe. Suranysqa usynys árqıly, baǵasy orta eseppen 13 myń teńgege shyǵady. Kazinform agenttiginiń tilshisi qaı aımaqta qymbat, qaısysynda arzan ekenin baǵamdap kórdi.
Jańa jyl jasyl sharshamen, Aıaz ata jáne Aqshaqarmen sándi. Ertegi keıipkerlerin eresekter úıge shaqyryp, balalaryna qııal-ǵajaıypqa toly kóńil-kúı syılaıdy. Suranysqa saı akterlar men anımatorlar eki apta buryn úı-úıdi aralaýǵa tapsyrys qabyldaıdy.
Aıaz ata men Aqshaqar shaqyrý elimiz boıynsha Parlodarda arzan bolyp shyqty. Munda baǵa 6 myń teńgeden bastalady. Ertegi keıipkerleri shaqyrǵan úıge shamamen 15 mınýt aıaldaıdy. Tek osy óńirde emes, elimizdiń barlyq aımaǵynda quttyqtaý ýaqytynyń uzaqtyǵy shamalas.
Qazaqstannyń astanasynda baǵa 7 myń teńge. Munda Aıaz ata men Aqshaqar úıge kelip, balalarǵa jattaǵan, daıyndaǵan taqpaǵyn aıtqyzady. Keıin aq tilegin aıtyp, keler jyly qaıta jolyǵatynyn, ózge balalar da kútip otyrǵanyn aıtady. Al baǵdarlama qyzyqty, oıynǵa toly bolsyn deseńiz, baǵa óse beredi.
Astanaǵa qaraǵanda Jezqazǵanda baǵa 500 teńgege joǵary. Munda qyzmet quny 7500 teńgeden bastalady. Aıta ketken jón, aımaqta bul qyzmetti usynatyn adamdar az. Degenmen sol 15 mınýt ishinde birge án aıtyp ta úlgeredi.
Al Shymkent, Qostanaı, Taldyqorǵan men Oralda baǵa 10 myń teńgeden bastalady. Aıaz ata balaǵa syılyq ákelmeıdi, ony ata-analar ózderi daıyndap, aldyn-ala berip qoıýy kerek. Keıbiri eki tilde de qyzmet kórsete alatynyn aldyn ala aıtyp qoıady.
Atyraýda baǵa sál ózgeshe. Munda qyzmettiń bul túri 12 myń teńgeden bastalady. Anımatorlar men akterlardy tek úıge emes, ujym balalarynyń merekelik keshterine de shaqyrýǵa bolady. Baǵa da sáıkesinshe óse beredi. Keıbir habarlamada 25-30 myń teńge dep baǵany bekitken. Al keıbirinde ár balaǵa taǵy 1-2 myń teńge qosylatyny eskertilgen.
Aıaz ata men Aqshaqar qyzmeti kóp aımaqta 15 myń teńge bolyp shyqty. Túrkistan, Qaraǵandy, Aqtóbe, Petropavl, Kókshetaý, Qyzylorda, Semeıde aqysyn tóleseńiz, Aıaz ata Aqshaqaryn ertip úıińizge keledi. Saparshylar olardy shaqyrmas buryn fotosyn aldyryp, kıim úlgisin kórip, tanysyp alýǵa keńes beredi. Balalardyń Aıaz ataǵa senip, shyn nıetpen tilek tileýi úshin basty keıipkerdiń kıimi laıyqty bolýy tıis. Kıimi jutań, olpy-solpy bolsa, saqal-murty qozǵalyp, ár jaǵynan adam keıpi anyq kórinse, bar qyzyq ǵaıyp bolady.
Al úshinshi orynda Aqtaý qalasy tur. Munda akterlar qyzmeti 18 myń teńgeden bastalady. Aıaz ata men Aqshaqar úıge kelip, syılyq usynady. Oıyn oınamaıdy, án aıtpaıdy. Tek estelik fotoǵa túsip úlgeresiz. Al eger ózge de baǵdarlama qosqyńyz kelse, baǵa 25 myń teńge bolady. Bir aıta ketetin jaıt, Aqtaýda básekelestik joq. Mundaı qyzmet túrin usynatyn akter az, sáıkesinshe baǵa da joǵary.
Ekinshi orynda Almaty men Óskemen tur. Munda baǵa 20 myń teńgeden bastalady. Almatyda tek qala ishinde emes, qala mańyndaǵy turǵyn alaptaryna da Aza ata men Aqshaqar barady. Ol úshin 10 myń teńge qosý kerek.
Jańa jyldyq kóńil-kúı syılaý qyzmeti Tarazda qymbat. Munda baǵa 25 myń teńgeden bastalady. Oǵan qaı kúni, neshede shaqyrǵany áser etedi. Tek qyzmet úshin aldyn ala aqysyn tólep qoıý óte qaýipti. Aldanyp qalsańyz aqshańyzdan aıyrylasyz, kóńil-kúıińiz buzylady.
Aıtyp óteıik, 30 jeltoqsanǵa deıin Aıaz ata men Aqshaqardy shaqyrý baǵasy tómen. Al 31 jeltoqsan kúni saǵat 21:00-den keıin eki, tipti úsh ese qymbattaıdy.
Eske salsaq, buǵan deıin tiri jáne jasandy shyrsha baǵasyn salystyryp, mandarın men torttardyń qunyn bildik.