Qazaqstannyń qaı áýejaılarynda ushaqtar qustarmen jıi soqtyǵysady
ASTANA. KAZINFORM – Qazaqstanda ushaqtardyń quspen soqtyǵysý jaǵdaılary kóbine Astana, Almaty, Shymkent, Atyraý jáne Aqtaý áýejaılarynda tirkeledi. Bul týraly Qazaqstannyń avıatsııalyq ákimshiligi Kazinform agenttiginiń resmı saýalyna bergen jaýabynda aıtty.
Vedomstvo málimetinshe, bul qalalardyń áýejaılarynda ushaqtar jıi ushyp-qonady. Sonymen qatar qustarmen soqtyǵysý jaǵdaılaryna olardyń maýsymdyq belsendiligi men áýejaılardyń ornalasý erekshelikteri de áser etedi.
– 2025 jyly áýe kemeleriniń qustarmen soqtyǵysýynyń 280 jaǵdaıy tirkelgen. Onyń 228-i Qazaqstan aýmaǵynda bolǵany belgili boldy. Al 2026 jyldyń alǵashqy úsh aıynda 33 jaǵdaı tirkelip, sonyń 27-si el aýmaǵynda bolǵany anyqtaldy, - delingen jaýapta.
Avıatsııalyq ákimshilik mundaı oqıǵa sanynyń kóp bolýy áýejaıdaǵy qaýip deńgeıiniń joǵary ekenin bildirmeıtinin atap ótti. Qaýip-qaterdi baǵalaý kezinde ushý-qoný operatsııalarynyń sany, jyl mezgili, qustardyń túrleri jáne soqtyǵysýdyń saldary eskeriledi.
Máselen, Nursultan Nazarbaev áýejaıynyń málimetinshe, 2025 jyly áýejaıda áýe kemeleriniń qustarmen jáne ózge de janýarlarmen soqtyǵysýyna qatysty 11 jaǵdaı tirkeldi. 2026 jyldyń basynan qyrkúıek aıyna deıin osyndaı 3 jaǵdaı tirkelgen.
Resmı málimetke sáıkes, ushaqtar qustarmen kóbine tómen bıiktikte ushqan kezde soqtyǵysady. Ásirese ushaq áýege kóterilgende, bıiktikke kóterile bastaǵanda jáne qonýǵa jaqyndaǵanda mundaı qaýip joǵary bolady.
Aıta keteıik, byltyr Air Astana ushaǵy quspen soqtyǵysqan bolatyn.
