Qazaqstannyń qatysýymen Hanchjoýda Dúnıejúzilik tsıfrlyq saýda kórmesi ótip jatyr
ASTANA. KAZINFORM — Qytaıdyń Chjetszıan provıntsııasyndaǵy Hanchjoý qalasynda qazaqstandyq kompanııalardyń qatysýymen V Dúnıejúzilik tsıfrlyq saýda kórmesi bastaldy, dep habarlaıdy Kazinform agenttiginiń Beıjińdegi menshikti tilshisi.
23-27 qyrkúıek aralyǵynda «Tsıfrlyq saýda kórmesinde ІІ bolashaǵyn birge qarsy alaıyq» uranymen ótip jatqan bes kúndik sharaǵa 2 myńnan astam kásiporyn qatysyp otyr. Kórmege 163 el men óńirden 50 myńnan astam qatysýshy tirkelgen. Olardyń 12 myńnan astamy — sheteldik qonaqtar.
Kórme ekspozıtsııasy taqyryptyq pavılondy jáne jasandy ıntellekt, «Jibek joly» aıasyndaǵy elektrondy saýda, ıntellektýaldy kólik, tsıfrlyq oıyn-saýyq, medıtsına jáne «aqyldy» keńistikterge arnalǵan alty arnaıy aımaqty qamtıdy. Sonymen qatar ınnovatsııalardy ıntegratsııalaýǵa arnalǵan arnaıy alań qarastyrylǵan.
Qazaqstan kórmege QR Saýda jáne ıntegratsııa mınıstrligi men «QazTrade» ulttyq kompanııasy uıymdastyrǵan ulttyq pavılonmen qatysyp jatyr. Qazaqstan ekspozıtsııasyna jasandy ıntellekt, bultty tehnologııalar, derekterdi óńdeý ortalyqtary jáne medıtsınalyq tehnologııalar salasynda ázirlemeler jasap jatqan 28 kompanııa kirdi.
— Hanchjoýda V Dúnıejúzilik tsıfrlyq saýda kórmesinde Qazaqstannyń ulttyq pavılonynyń ashylýy otandyq IT-kompanııalardyń syrtqy naryqtardaǵy qatysýyn keńeıtýdegi mańyzdy qadam. Bul qazaqstandyq tehnologııalyq ázirlemelerdi halyqaralyq aýdıtorııaǵa tanystyryp, jańa iskerlik baılanystar ornatýǵa múmkindik beredi, — dedi QR Saýda jáne ıntegratsııa mınıstrliginiń ókili.
Onyń aıtýynsha, Hanchjoýdaǵy kórme qazaqstandyq kompanııalardyń halyqaralyq iskerlik baılanystaryn nyǵaıtyp, áleýetti tapsyrys berýshilermen tikeleı ózara is-qımyldy damytýǵa keń múmkindik beredi.
— Bul jumys Memleket basshysynyń IT-qyzmetter eksportyn ulǵaıtý jónindegi tapsyrmasyn iske asyrý aıasynda júrgizilip jatyr. Mınıstrlik otandyq kompanııalardyń sheteldik naryqtarǵa shyǵýyna jaǵdaı jasaýdy júıeli túrde jalǵastyrýda. Hanchjoýdaǵy ulttyq pavılon — osy jumystyń naqty bir bóligi. Kórmede bastalǵan kelissózder birlesken jobalar men eksporttyq kelisimsharttarǵa ulasady dep úmittenemiz, — dedi ol.
Kórmeniń alǵashqy kúninde B2B-sessııasy uıymdastyrylyp, onda Qazaqstan kompanııalary óz ázirlemelerin tanystyryp, áleýetti seriktestermen kelissózder júrgizdi.
— Mundaı kezdesýler qazaqstandyq sheshimderdi naqty baǵyttarda qoldaný múmkindikterin talqylap, odan ári yntymaqtastyqtyń negizin qalaýǵa múmkindik beredi. Biz úshin Qazaqstannyń mańyzdy saýda-ekonomıkalyq seriktesi — Qytaımen dıalogty damytý erekshe mańyzǵa ıe, — dedi Saýda jáne ıntegratsııa mınıstrliginiń ókili.
Aıta keteıik, Hanchjoý — Qytaıdaǵy elektrondy kommertsııanyń iri ortalyǵy. Munda Alibaba Group, DeepSeek, Unitree Robotics, Hikvision, Dahua Technology sııaqty iri qytaılyq tehnologııalyq kompanııalar jáne basqa da kásiporyndar ornalasqan.
Buǵan deıin elektrondy saýda operatorlary Qazaqstanda 2027 jyldan erte jumys isteı bastamaıtyny habarlanǵan bolatyn.
