«QKFL» ZTB Qazaqstan fýtbol federatsııasy músheliginen shyǵaryldy

ASTANA. KAZINFORM – «Qazaqstannyń Kásibı fýtbol lıgasy» ZTB Qazaqstan fýtbol federatsııasy músheliginen shyǵaryldy. Bul týraly Astanada ótken Qazaqstan fýtbol federatsııasynyń kezekten tys XXVIII konferentsııasy barysynda belgili boldy.

QFF baspasóz qyzmetiniń habarlaýynsha, jańa ózgeristerge sáıkes, «Qazaqstannyń Kásibı fýtbol lıgasy» ZTB endi jarystar ótkizbeıdi, sondyqtan atalǵan uıymnyń QFF músheligindegi ókilettigi toqtaıdy. Sol sebepti, QKFL prezıdenti Atqarýshy komıtettiń quramyna laýazymy boıynsha ený quqyǵynan aıyryldy.

Aıta keteıik, Qazaqstan fýtbol lıgasynyń júıesi 3 satydan turady. Olar: premer-lıga, birinshi jáne ekinshi lıga. Sonymen qatar, elimizde áıelder lıgasy, sýperkýbok jáne lıga kýbogy sııaqty basqa da jarystar ótedi.

Qazirgi ýaqytta, fýtboldan el ishindegi barlyq jarystar tek QFF aıasynda ótip jatyr.

Osyǵan deıin habarlaǵanymyzdaı, Qazaqstan fýtbol federatsııasynyń prezıdenti Marat Omarovtyń tóraǵalyǵymen QFF-nyń kezekten tys XXVIII konferentsııasy ótti.

Osyǵan deıin Qazaqstan fýtbol federatsııasy Atqarýshy komıtetiniń jańa quramy belgili bolǵanyn jazǵan edik.