Qazaqstannyń qarjy naryǵynda krıptovalıýta aıyrbastaıtyn oıynshylar paıda bolady

ASTANA. KAZINFORM – Qazaqstanda krıptovalıýta aıyrbastaý qyzmetteriniń provaıderleri paıda bolady. Bul týraly AFSA (Astana halyqaralyq qarjy ortalyǵynyń qarjylyq qyzmetterdi retteý jónindegi komıteti) lıtsenzııalaý jáne qarjylyq tehnologııalar keńsesiniń basqarýshy dırektory Erkeǵalı Edenbaev málim etti.

- Mamyr aıynda Ulttyq bank memlekettik organdarmen birlesip tsıfrlyq aktıvter aınalymynyń quqyqtyq negizin qalyptastyratyn zańnamalyq túzetýler daıyndady. Osy túzetýler aıasynda quqyqtyq mártebesin aıqyndalǵan tsıfrlyq qarjy aktıvterin iske qosý josparlanýda. Naryq qatysýshylarynyń jańa sanaty – krıptovalıýtalardy aıyrbastaý qyzmetteriniń provaıderleri engiziledi. Lıtsenzııalanǵan krıptoaıyrbastaýshylar naryqty ashyq etýge alǵashqy qadam bolmaq, - deıdi ol.

Binance Kazakhstan bas menedjeri Nurhat Kóshimov bolashaqta qarjyny «dástúrli» jáne «tsıfrlyq» dep bólý birtindep joıylýy múmkin ekenin aıtady.

- Azamattar buryn artylǵan qarajatyn jyljymaıtyn múlikke, aktsııalar men oblıgatsııalarǵa ǵana salsa, qazir olardyń qataryna tsıfrlyq aktıvter qosyldy, - deıdi sarapshy.

Resmı málimet boıynsha, jyldyń birinshi toqsanynda Astana halyqaralyq qarjy ortalyǵy arqyly 1,7 mlrd dollardyń tsıfrlyq aktıvi tranzaktsııalanǵan.

Buǵa deıin KASE tóraǵasy Ádil Muhamedjanov ta Qazaqstan qor bırjasynda tsıfrlyq teńge qoldanylýy múmkin ekenin aıtqan edi.