Qazaqstannyń qandaı kedendik beketteri jańǵyrtyldy

ASTANA. KAZINFORM — Qarjy mınıstrligi Memlekettik kirister komıteti tóraǵasynyń orynbasary Baqytjan Slıamov elimizdiń memlekettik shekarasyndaǵy kedendik beketterdi jańǵyrtý jumystary týraly aıtyp berdi.

Onyń aıtýynsha, Eýrazııalyq ekonomıkalyq odaqtyń ishki shekaralary jáne syrtqy shekaralary bar.

— Bizdiń syrtqy shekaralarymyz Qytaımen, Ózbekstanmen, Túrikmenstanmen shektesedi. Biz osy shekaralardy jańǵyrtý mindetin qoıdyq. Sebebi bul baǵyttar eń qarqyndy jáne strategııalyq mańyzdy baǵyttardyń biri. Olar ekijaqty ǵana emes, EAEO sheńberinde tranzıttik marshrýttarǵa, sondaı-aq «Bir beldeý — Bir jol» jobasynda da qyzmet kórsetedi. Qazaqstan óziniń geosaıası jaǵdaıy, ekonomıkalyq áleýeti jáne tarıhı dástúrlerine baılanysty halyqaralyq ıntegratsııa men jahandyq ekonomıkalyq protsesterdiń belsendi qatysýshylarynyń biri bolyp otyr. Álemdik kólik júıesine qosylý taýarlardyń barynsha erkin jáne kedergisiz qozǵalysyn qamtamasyz etýdi qajet etedi. Bul kedendik baqylaý quraldarymen jáne bıznes-protsesterdi avtomattandyrý júıelerimen jabdyqtalǵan zamanaýı keden ınfraqurylymyn qajet etedi, — dedi B. Slıamov Ortalyq kommýnıkatsııalar qyzmetinde ótken baspasóz qyzmetinde.

Jyl basynan beri EAEO-nyń syrtqy shekarasyna avtomobıl ótkizý pýnkti arqyly eki jaqqa 605,7 myń avtokólik ótken. Byltyrǵy jyldyń sáıkes kezeńimen salystyrǵanda ótkizý qabileti 25% artqan. Osy kezeńde 1,6 trln teńge kóleminde kedendik tólemder túsip, jospar 106% oryndalǵan. Memlekettik shekara perımetri boıynsha 52 avtomobıl ótkizý pýnkti bar.

— Qazirgi ýaqytta 6 ótkizý pýnkti jańǵyrtyldy. Bul Qytaımen shekaradaǵy «Nur Joly», «Qaljat», «Alakól» pýnkteri. Úsheýi Ózbekstan Respýblıkasymen shekarada ornalasqan — «Baýyrjan Qonyspaev», «Qaplanbek», «Atameken». Bes ótkizý pýnkti jyl sońyna deıin kezeń-kezeńimen jabdyqtalady. Bul Túrikmenstanmen shekaradaǵy «Temir baba», Ózbekstanmen shekaradaǵy «Qazyǵurt», «Tájen», Qytaımen shekaradaǵy «Maıqapshaǵaı» jáne «Baqty» pýnkteri, — dedi spıker.

Jańǵyrtý sheńberinde kólik quraldaryn ashpaı jáne joǵary dáldikpen tekserýge múmkindik beretin zamanaýı ınspektsııalyq-tekserý keshenderi ornatylady, elektrondyq kezek jáne aldyn ala aqparattandyrý júıesi engiziledi.

Qurylys-montajdaý jumystaryna qaramastan jańǵyrtylatyn ótkizý pýnktteriniń ótkizý qabileti 2022 jylǵy 640 myń kólik quralynan 2024 jylǵy 1,4 mln-ǵa deıin 2,5 esege artqan.

— Tasymaldaýshylar men azamattardyń yńǵaılylyǵyna erekshe kóńil bólinýde. Barlyq rásim barynsha ashyq bolyp, shekarada bolý ýaqyty shamamen eki ese qysqardy. Bul qazirdiń ózinde iske qosylǵan 6 ótkizý pýnktiniń jumysynan kórinip otyr, keden zańnamasyn buzbaǵan jaǵdaıda shekaradan ótý ýaqyty 30 mınýtqa deıin qysqarǵan, — dedi komıtet ókili.

Buǵan deıin EAEO elderiniń kedendik baj úlesin esepteýdiń jańa ádistemesi engizilýi múmkin ekeni habarlanǵan edi.